ابن امه ج٢ منال علي

إنتِ لو عرفتي اللي أمي مخبياه عنك جوازنا مش هيكمل.
الجملة نزلت عليا زي جردل مية متلجة في عز طوبة.
وقفت متخشبة مكاني، حسيت إن رجلي مش شيلاني، والأوضة كلها بتلف بيا.
الموبايل في إيده لسه شاشته بتنور مع كل رنة من حماتي، وصوت الرنين بقى عامل زي دقات طبول في نفوخي.
بصيت في عينه
لأول مرة أشوف في عين أحمد الخوف ده كله. مش خوف راجل خايف من مراته تزعل، لأ ده خوف العيل اللي عمل مصيبة ومستني العقاب.
قولت له بصوت واطي ومرعوب من اللي هسمعه حكايات_منال_علي
يعني إيه يا أحمد؟ يعني إيه جوازنا مش هيكمل؟ أمك مخبية إيه؟
أحمد وطى راسه في الأرض، ومسك الموبايل بإيد بتترعش، وقفل الصوت خالص.
قولت له بصوت أعلى وبنبرة أول مرة أستخدمها معاه
رد عليا! سبع سنين عايشة معاك، مستحملة تدبيرات وتدخلات، وفي الآخر تقولي أمك مخبية حاجة تهدم بيتنا؟! انطق!
رفع عينه فيا، وكانت دموعه بتلمع، وقال
اقعدي بس يا نورهان اقعدي وافهمني عشان خاطري.
مش هقعد! انطق يا أحمد، إيه الرسالة دي؟ أنا عملت اللي اتفقنا عليه اتفقتوا على إيه من ورا ضهري؟
خد نفس طويل، قعد على طرف السرير، وحط إيده الاتنين على وشه وفضل يمسح فيه كأنه بيحاول يهرب من الحقيقة. وبعدين شال إيده وبص لي وقال بصوت مكسور
فاكرة الشقة اللي دفعنا فيها تحويشة عمرنا من سنتين؟
قلبي وقع في رجلي.
الشقة دي كانت حلمنا. الشقة اللي بعت فيها دهب شبكتي ودهب أمي اللي ورثته عنها، والجمعيات اللي كنت بشيلها من مصروفي ومصروف ولادي سبع سنين عشان نخرج من بهدلة الإيجار الجديد. الشقة اللي حلمنا ندخلها ونعيش فيها مستورين ومرتاحين.
قولت له بذهول
مالها الشقة؟ إيه دخل الشقة بأمك؟
بلع ريقه بصعوبة وقال
الشقة مش مكتوبة باسمنا يا نورهان.
حسيت إن الهوا اتسحب من الأوضة. مابقتش قادرة أتنفس. قربت منه خطوة وأنا مش مصدقة وداني
مش مكتوبة باسمنا إزاي؟ مش إنت قولتلي إنك خلصت إجراءات التسجيل في الشهر العقاري وكتبت نصها باسمي زي ما اتفقنا عشان دهبي وفلوسي؟
أحمد وطى راسه أكتر ومقدرش يحط عينه في عيني
أمي أمي هي اللي أصرت إن العقد يتكتب باسمها هي.
الكلمة كانت تقيلة أوي تقيلة لدرجة إني اتسندت على الدولاب عشان ما أقعش.
باسمها هي؟! ليه؟! وفلوسي؟ ودهبي؟ وتحويشة السنين دي كلها؟ عملت كده ليه يا أحمد؟!
بدأ يتكلم بسرعة وتلعثم كأنه بيدافع عن نفسه في محكمة
والله يا نورهان ما كنت ناوي أعمل كده! بس أمي لما عرفت إنك بايعة دهبك وحاطة فلوس وكاتبين الشقة بينا، فضلت تسخن فيا قالتلي الستات ملهمش أمان، لو اتخانقتوا ولا طلبت الطلاق هتاخد نص الشقة وترميك في الشارع، وأنا أمك وعمري ما هأذيك اكتب الشقة باسمي كأني أنا اللي شرياها لحمايتك، وأول ما الدنيا تستقر هبقى أعملك توكيل.
كنت ببص له ومش شايفة جوزي اللي أعرفه. كنت شايفة راجل ملوش شخصية، راجل ساب أمه تسرق شقى مراته وتجرده من كرامته تحت مسمى الحماية.
دموعي نزلت غصب عني، بس ما كانتش دموع حزن، دي كانت دموع قهر قهر سبع سنين راحت هدر.
قولت له بمرارة تكسر الحجرحكايات_منال_علي
سنتين يا أحمد؟ سنتين كاملين بتضحك عليا وتقولي التشطيبات واقفة عشان المصاريف، وإنت وهي مأمنين نفسكم على حسابي؟! سنتين وأنا بنام محروقة الدم على كل مليم بصرفه عشان نخلص الشقة، وإنت عارف إنها مش شقتي أصلًا؟!
قال وهو بيحاول يمسك إيدي
أنا غلطت، والله العظيم عارف إني غلطت بس والله أمي كانت هتعملي التوكيل! أنا كنت بس عايز أأمن مستقبلي من غير مشاكل!
نفضت إيده بقوة وصرخت فيه
تأمن مستقبلك مني أنا؟! من مراتك وأم عيالك؟! طب ورسالة النهاردة دي إيه؟ اتفقتوا على إيه تاني؟
سكت، والسكوت المرة دي كان وراه كارثة تانية.
صرخت بأعلى صوتي
انطق يا أحمد قبل ما ألم الناس كلها علينا!
اتنهد بصوت مرعوب وقال
أمي أجّرت الشقة من ورانا والرسالة دي معناها إنها استلمت المقدم وكتبت العقد مع المستأجر الجديد لمدة خمس سنين، وبفلوس الإيجار عايزة تجوز أختي الصغيرة.
في اللحظة دي، حسيت إن السقف وقع فوق نفوخي.
مش بس سرقوا شقايا دول اتصرفوا فيه وقبضوا تمنه عشان يحلوا مشاكل بيتهم، وأنا وعيالي نفضل متبهدلين في الإيجار وفي ضيق المصاريف اللي كانت حماتي لسه بتعايرني