ابن امه ج٣ منال علي

نزلت على السلم وأنا شادة على إيدين ولادي الاتنين، سامعة صوت صريخ حماتي من فوق، وصوت خطوات أحمد وهو بيجري ورايا وبيتوسل بصوت ملهوف: «نورهان! استني بس عشان خاطري.. متفضحيناش في الشارع.. هنحل كل حاجة والله!» وقفت عند مدخل العمارة، وبصيت له لآخر مرة.. نظرة كانت باردة كأنها تلج. قولت له كلمة واحدة: «الفضيحة إنتوا اللي عملتوها يوم ما استحلّيتوا شقايا.. دلوقتي القانون هو اللي بيننا يا أحمد.» وقفت تاكسي وركبت مع ولادي وطلعت على بيت أهلي. طول الطريق في التاكسي، ابني الصغير كان باصص في وشي وبيسألني ببراءة: «ماما، هو إحنا رايحين نقعد عند جدو عشان نتفسح؟» بصيت له وابتسمت وسط دموعي، وحضنته وقولت: #حكايات_منــال_عـلـي «آه يا حبيبي.. رايحين عند جدو عشان هنرتاح.. هنرتاح من حاجات كتير.» أول ما وصلت بيت بابا وحكيت له كل اللي حصل من الألف للياء، شفت في عينه نار ما شفتهاش في حياتي. بابا راجل طيب وعمره ما كان بتاع مشاكل، بس لما الحكاية توصل لكرامة بنته وحقها وشقاها، بيتحول لجبل ما يتهزش. بابا طبطب على كتفي وقال بصوت كله هيبة: «حقك هيرجعلك مليم ينطح مليم يا بنتي.. وراسك هتفضل مرفوعة. اللي يفرّط فيكي عشان أمه تسرقك، ملوش عيشة بيننا دقيقة واحدة.» ومن الليلة دي.. بدأت الحكاية تاخد طريق تاني خالص. تاني يوم الصبح، كنت قاعدة في مكتب المحامي، حطيت قدامه كل الأوراق: كشوفات حساب بنكي بتثبت تحويل فلوس الشقة لحساب حماتي، فواتير الدهب القديم اللي كان باسمي، تسجيلات ورسائل واضحة وموثقة بيني وبين أحمد باعترافه الكامل إن الشقة دي شقتي ومن مالي الخاص. المحامي ابتسم وقال: «أوراقك دهب.. كده عندنا شقين: شق جنائي يخص خيانة الأمانة والنصب ضدها وضده، وشق مدني لاسترداد المبالغ وفسخ أي تعامل على العقار.. غير قضايا الطلاق والنفقة.» وفعلاً.. الإنذارات الرسمية وصلت لحماتي ولأحمد خلال يومين بس. وهنا بقى.. الدنيا اتقلبت في بيتهم. حماتي اللي كانت داخلة بيتي بتبتسم بغرور وبتقولي "مش هتشوفي مليم"، بدأت تستوعب إن الموضوع مش خناقة حريم عادية هتنتهي بكلمتين وطبطبة.. دي قضية فيها حبس ومحاكم ورد شرف. أحمد فضل يرن ليل نهار.. مئات الرسايل: «يا نورهان أمي ست كبيرة مش حمل بهدلة محاكم..» «أنا هعملك اللي إنتِ عايزاه وهكتبلك الشقة كلها باسمك.. بس اسحبي الشكاوى!» «حرام عليكي تدمري بيتنا عشان شوية فلوس!» كنت بقرأ الرسايل دي وأبتسم بمرارة.. شوف البجاحة! بقى أنا اللي بدمر البيت عشان بطالب بحقي، والسرقة والغدر مكنوش تدمير للبيت؟! بعد أسبوع، لقيت الباب بيخبط في بيت بابا.#حكايات_منــال_عـلـي فتحت، لقيت حماتي ومعاها خال أحمد وعماته، وجايين قعدة صلح. حماتي كانت داخلة وشها مكسور، عينيها في الأرض، أول ما شافتني قربت مني وحاولت تحضنني وتعيط: «حقك عليا يا بنتي.. أنا كنت فاكرة إني بأمن ابني.. مكنتش أقصد أضيع حقك والله، إنتِ زي بنتي!» بصيت لها وقولت بهدوء تام: «بنتك اللي كنتِ عايزة تجيبي جهازها بفلوس دهبي وشقايا يا طنط؟ لو كنت زي بنتك مكنتيش استكترتي عليا أعيش في أمان مع جوزي.» القعدة كانت حاسمة.. بابا والمحامي كانوا قاعدين وحاطين الشروط على الترابيزة: ١. الشقة تتنازل عنها حماتي رسمي في الشهر العقاري ليا بالكامل كتعويض عن الدهب والفلوس. ٢. عقد الإيجار يتلغي أو فلوسه تتحول في حساب ولادي. ٣. الطلاق يتم بالمعروف وبكامل حقوقي المؤخر والنفقة للعيال. أحمد كان قاعد في القعدة دي مكسور، باصص لأمه بعتاب وغضب حقيقي لأول مرة في حياته، وبص لي وقال بصوت بيرتعش: «طب نتطلق ليه يا نورهان؟ ما كل حاجة هترجعلك اهي.. نبتدي صفحة جديدة عشان العيال.» بصيت في عينه وقولت له الكلمة اللي قفلت كل الأبواب: «يا أحمد.. الراجل اللي يخلي أمه تدخل في خصوصيات سريره، ويسمح لها تسرق شقى مراته، ويسكت عشان ميعرفش يقول لأ.. ده ميتعاشرش معاه أمان تاني أبداً. المشكلة عمرها ما كانت في الفلوس.. المشكلة إنك مكنتش ضهري، كنت السكينة اللي في ضهري.» وتم كل شيء. حماتي اضطرت تتنازل عن الشقة وتبيع نصيبها وتدفع باقي الفلوس عشان تفادي الحبس والقضايا، وعقد الإيجار اتفسخ بالتراضي مع المستأجر. ورقة طلاقي استلمتها بعد شهرين بالظبط.#حكايات_منــال_عـلـي في اليوم اللي استلمت فيه ورقة الطلاق، روحت شقتي.. الشقة اللي كانت مكتوبة لينا من البداية. فتحت الباب بالمفتاح، ودخلت مع ولادي. الشمس كانت مالية المكان، والبيت نضيف وهادي، مفيش فيه همس ولا مراقبة ولا مكالمات بالليل ولا حد بيحسب عليا النفس اللي بتنفسه. قعدت على الأرض في نص الصالة، ولأول مرة من سبع سنين، بكيت.. بس مكنتش دموع قهر، كانت دموع حرية وراحة. عرفت وقتها أكبر درس في حياتي: إن السكوت على التدخلات الصغيرة في أول الجواز، هو اللي بيصنع الكوارث الكبيرة في آخره.. وإن الراجل اللي ملوش شخصية قدام أهله، عمره ما هيعرف يبني بيت فيه أمان.. وإن الست اللي تحافظ على كرامتها وحقها، ربنا بيوقف لها ولاد الحلال وبيرجعلها حقها تالت ومتلت. النهاردة.. أنا عايشة في شقتي مع ولادي، بشتغل وبكبرهم برواقة بال وسلام نفسي.. وأحمد؟ سمعت إنه عايش مع أمه في نفس البيت، بس كل ما يبص في وشها، بيفتكر إنها كانت السبب في إنه يخسر بيته، وعياله، والست الوحيدة اللي كانت شارياه بجد. والباب اللي اتقفل من سنتين.. فتح قصاده أبواب حياة جديدة كلها نور وكرامة.

مقالات ذات صلة

الهديه ج١ منال علي

نوايا مسمومه ج٤ منى السيد

ماهر وهند ج٢

بطوله مزيفه ج1 منال علي

جوزي كسر سرير بنتي

شهد عبد السلام ج٤

اترك تعليقاً إلغاء الرد