عيد ميلاد ابن اخويا ج1 منى السيد
. أمي غمضت عينيها، ودمعة سخنة نزلت على خدها المجعد، وقالت بصوت هادي وموجوع يقطع نياط القلب أنا يا بنتي عمري ما خربت بيت حد، ولا عمري كنت سبب في إن عيل يبعد عن أمه.. بس اللي ملوش خير في أهل جوزه، وبيخبي ويداري ويسرق من مال بيته عشان يدي لبرة ويجرح اللي شالوه.
. ربنا بيكشفه من فوق سبع سماوات.. أنا مسمحاكي على قهرة قلبي بتاعت الصبح، ومسمحاكي على العيد ميلاد اللي استكترتي عليا لقمته، لكن بيتك وجوزك.. ده سرهم بينك وبين ربنا وبينه هو، هو صاحب القرار. أمي لفت ضهرها ونزلت على السلم ببطء شديد، وأنا كنت ماسكة إيدها بسندها، ورجليها كانت بتترعش من الوجع والضغط.
وأنا نازلة معاها، سمعت طارق فوق بيقولها بنبرة قاطعة مفيهاش أي رجعة أنا مش هطلقك دلوقتي عشان خاطر العيال والناس متتكلمش.. بس أنتي طالعة من البيت ده بشرفك، تروحي بيت أبوكي وتقعدي هناك، لحد ما ترجعي الحلق اللي سرقتيه، وساعتها نقعد مع الكبار ونشوف الجوازة دي هتكمل إزاي، ده لو كملت!
. نزلنا الشقة تحت، وأمي قعدت على الكنبة زي الكومة الهامدة. دخلت بسرعة المطبخ عملت لها كوباية كركديه بارد، وجبت جهاز الضغط عشان أقيسهولها. إيدي كانت بتترعش وأنا بلف الشريط على دراعها، كان الضغط واصل 170 على 100! يا أمي، بالله عليكي اهدي، متعمليش في نفسك كده عشان واحدة متستاهلش!
قولت الكلام ده وأنا بحاول أداري الرعب اللي في عيني من القراءة العالية دي. أمي بصت في السقف وقالت بشرود مش عشانها يا منى.. أنا قلبي واجعني على أخوكي.. طارق حنين، وشايل فوق طاقته، متغرب وشقيان في الشمس والمطرة عشان يوفر لقمة حلال، والآخر يتجازى بالغدر من أقرب الناس ليه؟
أنا كنت حاسة يا بنتي، قلبي كان دايماً قارصني من البت دي، بس كنت بقول معلش عشان خاطر الولاد نمشي المركب.. بس المركب اللي تخرمها قلة الأصل لازم تغرق. في الوقت ده، كان صوت الدوشة فوق هدي تماماً.
وبعد حوالي نص ساعة، سمعنا صوت خطوات نازلة على السلم، مش خطوات ياسمين لوحدها.. خطوات كذا حد. قومت براحة وبصيت من العين السحرية بتاعة الباب، لقيت أبو ياسمين، راجل كبير على المعاش، وشه في الأرض مش قادر يرفعه، ومعاه ياسمين شايلة شنطة هدومها وماسكة إيد بنتها فريدة وبتعيط، وأخوها الشاب اللي كان السبب في كل المصيبة دي ماشي وراهم وشه أصفر زي اللمونة، ومحدش فيهم نطق بحرف ولا حتى خبطوا على باب أمي يعتذروا أو يطيبوا خاطرها.
