لعبه النهايه

هناء سلفتها ضحكت بصفار وقالت: “والله يا حماتي إنتي دماغك دي تتوزن بالدهب! وهي مش بتشتكي خالص؟”

ردت الست روحية باستخفاف: “تشتكي ليه؟ دي واحدة طيبة بزيادة، وعندها عقدة ذنب دايمة إنها مقصرة. أنا قريتها من أول يوم.. كفاية بس ألمّح لها إن المعاش خلص والكهربا غليت، تروح محولة في ثانية، لا بتناقش ولا بتجادل.. بقالنا 5 سنين على الحال ده.”

هناء سألتها: “وطيب والفلوس دي بتعملي بيها إيه؟”

حماتي ردت ببرود: “بصرفها على نفسي يا ختي، وبدلع بيها عيالك، وبشيل منها قرشين للزمن. الشهر اللي فات طلعت رحلة مع النادي لمرسى علم، وطبعاً هي فاكرة إني كنت بجيب علاج للضغط والسكر.”

هناء ضحكت: “وتامر عارف؟”

“وتامر ماله؟ تامر في صف أمه طبعاً، وبعدين هو اللي بيقنعها كل شهر إن المعاش مش مكفي. هي اللي اختارت، كان لازم تفكر قبل ما تدخل عيلتنا وتعمل فيها ست الكرم.. خليها بقى تدفع ضريبة إنها (مرات الابن) الشطورة.”

الاثنين قعدوا يضحكوا بصوت عالي.

ولاء كانت واقفة في الطرقة، وشها خالي من أي تعبير، لا غضب ولا دموع. فجأة حست بهدوء غريب وبرود ماشي في جسمها، كأن الغشاوة انزاحت من على عينيها. لفت ورجعت من سكات، وقفت الباب وراها بالراحة جداً. من غير صويت، ومن غير خناق.

نزلت ركبت عربيتها، وطلعت الموبايل. فتحت تطبيق البنك، ودخلت على “المدفوعات المتكررة” لبطاقة حماتها، وعملت “إلغاء”. دوست تأكيد، ورمت الموبايل على الكرسي اللي جنبها. انتهى الأمر.. ولا مليم تاني.

لما رجعت البيت، وحسبت هي دفعت كام في الـ 5 سنين دول.. الرقم كان يخض، داخل في نص مليون جنيه! ضحكت بمرارة.. “مرسى علم.. وعيال هناء.. ودلع.. وأنا اللي كنت فاكرة إني بسدد فواتير!”

بالليل، تامر رجع من الشغل، ولاء قالتله ببرود: “بالمناسبة، أنا لغيت التحويل الشهري اللي بيروح لـ والدتك.”

تامر اتصدم ووقف مكانه: “نعم؟ ليه يا حبيبتي؟ حصل حاجة؟”

قالت بهدوء: “عشان مش هدفع لها مليم تاني.”

تامر بدأ يوتر نفسه: “بس إنتي عارفة إن معاشها صغير والدنيا غلا…”

بصت له في عينه وقالت: “ما تكملش.. أنا عرفت كل حاجة. كنت عند الست روحية النهاردة والباب كان موارب، وسمعتها وهي بتشرح لهناء قد إيه أنا (هبلة) وبضحك عليا بكلمتين.. وسمعت حكايات مرسى علم والفلوس اللي بتوزعها يمين وشمال وهي بتمثل عليا دور الغلبانة.”