ورث مراتي ج٣

هو اللي بيتكسر في كرامة الست ونخوة الراجل بينفع يتصلح؟ أنت ما كفلكش إنك راجل البيت ومسؤول عننا.. أنت حاطت عينك على ورثي، وجبت أمك وأخواتك يذلوني في بيتي، وكنت بتستغفلني عشان تجوز عليا بفلوسي! أنت فتحت باب من الخسة، والباب ده لما بيتفتح بياخد معاه كل حاجة حلوة.”قربت خطوة وقالت بثبات:— “أنا قعدت معاك مش عشان بحبك ولا عشان مستنية تتغير..

أنا قعدت عشان عيالي ما يتربوش بعيد عن أبوهما، وعشان بيتي اللي تعبت فيه ما يتهدش. أنت عايش معايا أكلك وشربك وغسيلك بيتعملوا على أكمل وجه.. بس قلبك وثقتك وبصتي ليك كراجل أتسند عليه؟ دول ماتوا من اليوم اللي فكرت فيه تعمل عليا راجل بأهلك.”سكتت لحظة، وبعدين كملت وهي بتبص في عيني مباشرة:— “ورثي اللي كنت طمعان فيه؟ مش هتشوف منه مليم، وعايزه يفضل محطوط في البنك للزمن ولعيالي.

وأنت هتعيش تصرف على بيتك قرش ينطح قرش من عرقك.. تعيش راجل بجد، مش بتمثيلية.”سابتني ومشيت ودخلت أوضتها، وأنا فضلت قاعد في مكاني مش عارف أرد..ساعتها بس فهمت إن أقصى عقاب ممكن تديه لك ست أذكى منك، مش إنها تتخانق معاك أو تطلب الطلاق.. العقاب الحقيقي إنها تسيبك عايش معاها تحت سقف واحد، بس تجردك من هيبتك وتخليك تشوف نفسك في الملاية كل يوم كـ “عيل صغير” خسر بيته وكرامته عشان نزوة وطمع!

ومرت الشهور.. وكانت أصعب شهور عدت عليا في حياتي. الهدوء القاتل اللي في البيت كان بيعصرني كل يوم، بس المرادي قررت إني ما أهربش ولا أعاند. استوعبت إن الطريق الوحيد عشان أرجع راجل في عين نفسي وفي عينها، هو إني أتحمل نتيجة أفعالي وأثبت لها إن الشدة والأزمة دي طلعت مني راجل جديد. بدأت أغير كل حاجة في حياتي من الساس للرأس.

نزلت شغلي بروح تانية خالص، بقيت أشتغل ورديتين وأسهر عشان أزود دخلي بحلال الله. بقيت أرجع البيت هدومي مبلولة عرق وتعب، وأحط المصاريف كلها في إيدها بالقرش، وأقولها بمنتهى الرضا:— “دي مصاريف البيت، والحمد لله ربنا بارك في القرشين بتوع النهاردة.”ما بقتش أفتح سيرة الورث ولا الفلوس من قريب أو بعيد، بل بالعكس.

. بقيت أقولها: (فلوسك وورثك دول حقك وحق عيالك، شيليهم للزمن وأنا المسؤول عن كل لقمة بتدخل البيت ده).بدأت أصلح اللي أفسدته مع أهلي كمان؛ جمعت أمي وإخواتي، وقولتلهم بوضوح وشدة بس بأدب: (اللي حصل زمان كان غلطتي أنا، ومراتي على راسي وبيتي خط أحمر، ومحدش يتدخل بيني وبينها تاني).. وحطيت حدود واضحة للجميع عشان أحمي بيتي وكرامة مراتي اللي هانتها بسبب طمعي.