محكمه الاسره ج٢ منال علي

أول ما شاف الورقة اللي في إيدي
ملامحه كلها اتبدلت.
الابتسامة الواثقة اللي كانت مالية وشه اتمسحت في ثانية، وحل مكانها لون أصفر باهت، كأن الدم هرب من عروقه.
كانت ورقة مطوية طالع منها شريط أحمر، وجنبها فلاشة صغيرة لونها فضي.
الست الحامل اللي جنبه لاحظت التغيير.
شدت على دراعه أكتر وسألته بصوت رفيع ودلع مش في وقته
في إيه يا شريف؟ مين دي وإيه الورق ده؟ مش قولتلي هنمضي ونمشي علطول عشان ميعاد الدكتورة؟
شريف مردش عليها.
عينه كانت متبتة في الورقة اللي بين صوابعي.
بلع ريقه بصوت مسموع، وقرب مني خطوة، وصوته اتهز لأول مرة
إنتِ… جبتي الورق ده منين يا نادين؟ مين وصلك للحاجات دي؟
رجعت ضهري لورا وسندت على الحيطة ببطء، عشان وجع العملية ميبانش في صوتي.
بصيت لابني اللي كان نايم في هدوء تام وسط الزحمة، ومسحت على راسه بحنية، وبعدين رفعت عيني لشريف وقلت بهدوء يغيظ
فاكر ليلة الولادة يا شريف؟
لما اتصلت بيك أربع مرات والنبض بتاع ابنك كان بيقف؟
ولما بعتلي تقولي متتصليش كتير أنا مشغول؟
الست الحامل اتدخلت ورفعت حاجبها
بقولك إيه يا شاطره، بطلي شغل الاستعطاف ده! شريف مبيحبكيش،

واللي بينكم خلص، والراجل كتر خيره هيسيبلك الشقة ومصاريف للواد، فامضي وخلي عندك شوية كرامة!
بصيت للست دي لأول مرة من فوق لتحت. حكايات_منال_علي
شكلها صغير في السن، ومغرورة ببطنها المنفوخة وفاكرة إنها مسكت السما بإيدها.
ابتسمتلها بهدوء يقلق
اسمك ياسمين، صح؟
شريف مقالكيش بقى إن الشقة اللي بيقولك هيسيبهالي دي أصلاً مكتوبة باسمي بفلوس ورث بابا الله يرحمه؟
ومقالكيش كمان إنه بايعها بعقد ابتدائي تزوير لحد تاني عشان يسدد شيكات كانت هتدخله السجن؟
ياسمين برقت، ولفت وشها لشريف
شريف! الكلام ده بجد؟! إنت قولتلي دي شقتكم التمليك وهتنقلني فيها بعد ما تولد!
شريف زعق فيها بعصبية عمري ما شفتها منه
اسكتي إنتِ دلوقتي متدخليش!
وبعدين وطى عليا وقال بفحيح زي التعبان
نادين، اطلعي معايا بره دلوقتي نتكلم راجل لست بلاش فضايح هنا!
قلتله بصوت عالي كفاية إن المحامين اللي حوالينا والستات اللي قاعدة تبص علينا
فضايح؟! هو في فضيحة أكتر من إنك متجوز عليا بقالك ست شهور؟
ولا في فضيحة أكتر من البلاغ اللي متقدم للنائب العام من ساعتين بخصوص التوكيل اللي سرقته ومضيت بيه على بيع أسهم الشركة؟
شريف اتسمر مكانه. حكايات_منال_علي
الورقة اللي في إيدي ماكانتش مجرد ورقة طلاق ولا اتفاق.
دي كانت صورة رسمية من محضر استيلاء ونصب، وجنبها مفاجأة تانية كانت هتدمره هو وياسمين مع بعض.
ياسمين حطت إيدها على بطنها وابتدت ترجع لورا بخوف
شريف إنت مأمني إن كل حاجة قانونية وإنك شاري نص الشركة!
فتحت الورقة التانية بهدوء وخليت ياسمين تشوف الختم اللي عليها
والأحلى من ده كله يا ياسمين التحليل والتقرير الطبي اللي هنا.
شريف اتجنن، ومد إيده عشان يخطف الورق مني، لكن المحامي بتاعي اللي كان مراقب المشهد من بعيد دخل فجأة ووقف حيطة سد بيني وبينه، ومسك دراع شريف بحزم
إيدك يا أستاذ شريف! إحنا في مجمع محاكم، والمدام مش لوحدها، وأي حركة غبية هتتحبس متلبس بالاعتداء.
شريف وشه احمر وعروق رقبته نفرت
يا متر لم موكلتك! الورق ده مزور، دي بتتبلى عليا وعايزة تخرب بيتي!
قلتله بنبرة باردة زي التلج
التقرير ده من المستشفى الدولي يا شريف من الدكتور اللي رحتله من 8 شهور وعملت عنده العملية إياها عشان العلاج، والتقرير طالع ومختوم بأن نسبة الإنجاب عندك في الفترة دي كانت مستحيلة قطعيًا لمدة سنة كاملة بسبب الأدوية المكثفة!
الممر كله فجأة هدي، كأن الناس كلها كانت سامعة.
شريف وشه اتقلب أبيض كالكفن.
لأنه كان عارف الحقيقة دي ومخبيها، وأنا مكنتش عارفاها غير لما فتش في أوراقه القديمة ليلة امبارح مع محامي العيلة.
أنا ابني ده جه بمعجزة قبل ما يبدأ علاجه ده بشهر
لكن ياسمين؟
ياسمين حامل في الشهر الخامس!
ياسمين بصت للورق، وبعدين بصت لبطنها، وبعدين بصت لشريف وعينها بتلف في كل حتة برعب
ش… شريف… الكلام ده مش مظبوط، صح؟ إنت قولتلي…
نادين بصتلها بابتسامة موجوعة لكن قوية
السؤال مش لشريف يا ياسمين
السؤال ليكي إنتِ حكايات_منال_علي
اللي في بطنك ده ابن مين؟!
الكلمة نزلت على شريف زي رصاصة في نص راسه.
بص لياسمين بنظرة مرعبة خلت البنت تترعش وتتكفي على نفسها.
المحكمة كلها كانت بتبص عليهم.
وفجأة، الباب الحديد بتاع القاعة اتفتح، وصوت الحاجب رن في الطرقة
قضية رقم 245 نادين منصور ضد شريف عبد الرحمن!
حضنت ابني أكتر، وقفت على رجلي اللي كانت بتترعش من التعب، وبصيت لشريف اللي كان بينهار قدامي ومش عارف يمسك مين ولا يرد على إيه.
قلتله وأنا ماشية وسايباه في جحيمه
الجلسة بدأت يا شريف بس اللعبة لسه في أولها.