بيت الحماه ج1 منال على

جـوزي أقنـعني نسـيب شقتنا ونعـيش مع حمـاتي عشـان نوفـر الإيـجار...ماكـنتش أعـرف إن ده هيكون بداية لأيام عمري ما أنساها! أماني كانت بتقفل باب الشقة اللي مأجرينها، وبصت بصّة أخيرة على الأوضة والصالة الصغيرة اللي في طرف القاهرة. سنتين عاشـتهم مع «أحمد» هنا، ورغم إن المكان كان ضيق، بس كانوا حاسين بالحرية. محدش بيقولهم ناموا إمتى، ولا اطبخوا إيه، ولا حتى الفوط تترتب إزاي في الحمام. أماني اتنهدت، وسحبت شنطة هدومها وراها وهي خارجة. كل ده بدأ من شهر، لما أحمد رجع من عند والدته وعينه بتلمع من الفرحة. قعد جنبها على الكنبة، ومسك إيدها وقال بحماس: «بصي يا حبيبتي، أنا اتكلمت مع ماما... هي قاعدة في شقة تلات أوض لوحدها، والمكان واسع عليها وتعبانة في مصاريفه ونضافته. اقترحت علينا ننقل نعيش معاها... تخيلي هنوفر قد إيه من فلوس الإيجار اللي بتترمي في الأرض دي!» أماني سحبت إيدها وهزت راسها برفض: «يا أحمد بلاش... أنا عارفة مامتك. طنط نادية شخصية صعبة شوية وليها نظامها، وإحنا أكيد هنتصادم مع بعض.» أحمد لوّح بإيده بقلة صبر: «يا بنتي إيه الكلام ده؟ دي أمي، دي ست دهب! بس إنتوا لسه مخدتوش على بعض. تخيلي هيبقى عندنا أوضتنا الخاصة، ومطبخ واسع، وحمامين! والفلوس اللي بندفعها في الإيجار دي نشيلها مقدم لشقة تمليك لينا.» أماني سكتت. حصري علي روايات واقتباسات كانت حاسة بخوف، بس كلامه عن شقة العمر كان منطقي. الإيجار فعلًا كان بياكل نص المرتب. أحمد كمل إقناع: «نجرب بس... ولو مانفعش، نرجع نأجر تاني. هي وعدتني إنها مش هتدخل في خصوصياتنا.» وبعد تلات أسابيع من الزن والكلام عن الستائر الجديدة والدولاب اللي حماتها فضته مخصوص عشانهم، أماني استسلمت. نادية استقبلتهم بابتسامة عريضة على الباب، حضنت ابنها، وبصت لأماني ببرود وقالت: «نورتوا... أنا فضيتلكم الأوضة اللي جوه، بعيدة عن دوشة الشارع عشان ترتاحوا.» أماني دخلت وبصت حواليها. الشقة كانت واسعة ونضيفة، بس فيها برود غريب. صور حماها الله يرحمه كانت في كل حتة، والفرش كلاسيك وتقيل. نادية فتحت باب أوضة صغيرة وقالت: «دي أوضتكم... فيها كل حاجة، والكنبة بتتفرد وسريركم موجود.» أماني استغربت وسألت: «بس ليه دي يا طنط؟ الأوض التانية أوسع بكتير.» #حكايات_منــال_عـلـي نادية ردت بحزم: «الأوض التانية فيها عفش المرحوم وحاجته، ومابسمحش لحد يلمسها... دي ذكرى غالية.» أحمد ضغط على إيد مراته عشان تسكت، وهي وافقت وبدأت ترص هدومها، بس جواها كان فيه قلق. أول أسبوع عدى بسلام... بس الهدوء ده ماطولش. وفي يوم، وأنا واقفة بحضر العشا، لقيت حماتي بتزعق في وشي:«إيه القطع ده؟ إنتي إيديكي مالها معوجة كدة ليه؟ مابتعرفيش تمسكي السكينة؟» أماني اتصدمت من طريقتها، بس سكتت وعدّت الموقف عشان ماتعملش مشكلة. ومن اليوم ده، نادية بدأت تتدخل في كل حاجة أماني بتعملها، وكل شوية تلاقي عندها ملاحظة جديدة. وفي يوم سبت، نادية خبطت على باب أوضتهم الصبح بدري: «يا أماني، قولي يا حبيبتي... إنتوا لسه شباب وصحتكم حلوة، مش تساعديني في الشقة؟ الأرض محتاجة تتمسح والنجف يتلمع، وأنا كبرت ومبقتش قادرة على الشقة دي كلها.» أماني بصت لأحمد، اللي كان عامل نفسه نايم ومركز في الموبايل. وقالت: «حاضر يا طنط، هلبس وأقوم أنضفها.» نادية وهي خارجة قالت: «أيوة كدة... أصل في ناس فاكرة إنها قاعدة في فندق!» ومع مرور الأيام، أماني اكتشفت إنها وقعت في فخ. نادية مش بس كانت بتطلب مساعدة... دي بقت بتأمر! كل إجازة بتتحول لـ «يوم نظافة عالمي». أماني بتمسح وتكنس وتغسل، وأحمد يا إما عند صحابه، يا إما قافل على نفسه الأوضة. والأسوأ كان الانتقادات اللي مابتخلصش: «أماني، ليه الجزم مش مرصوصة جنب الحيطة بالمللي؟» — «أماني، ليه الطاسات محطوطة في الدرج ده؟ أنا قلتلك بتتحط تحت!» — «معلش يا طنط، نسيت.» نادية ترد بسخرية: «نسيتي؟! أيامنا كانت الست بتمشي على عجين ماتلخبطوش عشان ترضي حماتها، إنما جيل دلوقت دلوع.» أماني جابت آخرها، واتكلمت مع أحمد: «أحمد، مامتك بقت صعبة أوي... مابتسيبش هفوة إلا وتعلق عليها. أنا مش خدامة هنا.» أحمد رد ببرود: «يا أماني، هي متعودة على نظام معين. استحملي... إحنا بنوفر فلوس، ماتكبريش الموضوع.» وفي يوم، أماني رجعت من شغلها ولقت مفاجأة. العفش في أوضتها كله متبدل! الدولاب في حتة، والسرير في حتة، وكتبها اللي كانت مرصوصة اتحطت في كرتونة على الأرض. أماني ندهت وهي بتغلي:«يا طنط! إيه اللي حصل في الأوضة؟» نادية خرجت من المطبخ وهي بتمسح إيدها وقالت بكل هدوء:«عملتلك مفاجأة... غيرت الديكور عشان الطاقة. والكتب كانت لامة تراب، فشيلتها. رصيها إنتي بقى براحتك.» أماني دخلت أوضتها، وقفلت الباب بالمفتاح. إيدها كانت بتترعش من القهر. مسكت تليفونها وكلمت مامتها: «ماما... أنا خلاص مش قادرة. بتدخل في كل حاجة، حتى خصوصيات أوضتي! أنا بنهار.» أمها ردت عليها بحكمة: «يا بنتي، لازم تقفي وقفة مع جوزك. دي مامته هو، وهو اللي لازم يحل الموضوع. يا إما يضمن ليكي كرامتك، يا إما تسيبي البيت. ماتسمحيش لحد يكسرك.» أماني قفلت المكالمة، وهي مقررة تحط أحمد قدام الأمر الواقع: يا إما يخرجوا من البيت فورًا. .. يا إما كل حاجة هتتغير. بس اللي حصل بعد ما واجهت أحمد، كان آخر حاجة أماني تتوقعها... 😳 #حكايات_منــال_عـلـي يتبع...

مقالات ذات صلة

الغربه وقله الاصل منى السيد

سقوط الجلاد ج٢ شروق خالد

حماتي قالت لي

مين الى طرده

بصي على الفلاشه

بنت الملجأ ج2

اترك تعليقاً إلغاء الرد