ناكره الجميل ج٢ صافي هاني
كان اسم كريم مكتوب بوضوح
رفع الضابط الورقة قدام الجميع وقال
دلوقتي بقى عندنا سبب واضح يخلينا نعرف مين كان مستفيد من وفاة سامح
في اللحظة دي كريم فقد أعصابه تمامًا
وبدون أي إنذار جرى ناحية باب الشقة بكل قوته وهو بيحاول يهرب
لكن أول ما فتح الباب اتفاجأ بأفراد الشرطة واقفين في السلم مستنيينه
ولما حاول يفلت منهم صاح بأعلى صوته
أنا هقول الحقيقة كلها… بس مش هنا… لأن اللي بدأ الخطة من الأول… مش أنا…رجال الشرطة مسكوا كريم قبل ما ينزل السلم
الضابط بص له وقال
يبقى قول الحقيقة دلوقتي
كريم قعد على أول درجة وهو بينهج
وبعدين رفع عينه ناحية أمه
لأول مرة ماكانش بيبصلها باحترام
كان بيبصلها بخوف
وقال بصوت مكسور
أنا غلطت… لكن أول واحد اقترح كل اللي حصل ماكنتش أنا
حماتي صرخت فيه
اسكت
لكن الضابط قال بحزم
سيبه يتكلم
كريم بلع ريقه وقال
بعد ما اتجوزت منى بسنتين ولما عرفنا إنها مش بتخلف بسرعة أمي بدأت كل يوم تقولي إن اسم العيلة هيضيع وإن لازم يبقى عندنا حفيد
كنت برفض في الأول
لكن فضلت تضغط عليا
وبعدين لما سامح اتجوز نجلاء وأصبحت قريبة مننا… أمي هي اللي كانت بتخليني أروح أساعدها في أي حاجة
بصيت لحماتي وأنا حاسة إن كل كلمة بتأكد اللي كنت شاككة فيه
كريم كمل
مع الوقت أنا ونجلاء قربنا من بعض
ولما عرفت إنها حامل خفت
قلت لازم أعترف لمنى
لكن أمي قالت لي اسكت
وقالت إن سامح هيفتكر الطفل ابنه
ولو عرف الحقيقة هيطلقها
وساعتها كل حاجة هتضيع
نجلاء كانت بتعيط وهي بتقول
أنا قلتله بلاش
والله قلتله بلاش
لكن حماتي صرخت فيها
إنتي كمان اسكتي
الضابط سأل كريم
وسامح مات إزاي
كريم نزل راسه
وقال
أقسم بالله أنا ما قتلتوش
آخر مرة شفته كان جاي يواجهني
كان عرف إن في علاقة بيني وبين مراته
اتخانقنا
وساب البيت وهو متعصب
وبعدها بساعات عرفنا إنه عمل حادث بالعربية
الضابط سأله
يبقى ليه خبيتوا الحقيقة
رد كريم
لأننا كنا عارفين إن الناس كلها هتتهمنا
