بعد اقل من ساعه من سبوع بنتي
تعالالي بسرعة الحق أختك! طارق.. مراتك فجرت وعايزة تموتني، وطلبت لي البوليس وبتتبلى عليا وتقول إني بشرب مخدرات! لو مجيتش دلوقتي أختك هتتسحل وتترمي في الحجز يا طارق!
ما عداش عشرين دقيقة، والبوليس لسه واصل، لقيت طارق وحماتي نازلين من الأسانسير ووشوشهم مخطوفة ومرعوبين. حماتي أول ما شافت بنتها قاعدة في الأرض وبتعيط وتندب، قعدت تصوّت وتلطم على فخاذها
يا مِصيبتي يا بنتي! جرى لك إيه يا قلب أمك؟ مين اللي عمل فيكِ كده؟
وبصت لي وعيونها طالع منها شرار وكان ناقص تأكلني بسنانها، وراحت جارية عليا ورفعت إيدها علشان تضربني بالقلم
يا مروة يا وش الفقر يا بنت الذين! أنتِ خلاص اتهبلتِ في دماغك وبتمدي إيدك على أخت جوزك؟
رجعت خطوة لورا بكل برود، وسيبت إيدها تضرب في الهواء وقلت
بنتك الكريمة كسرت شقتي وقعدت فيها بلطجة، وتستاهل الدفن مش الضرب بس، وأنا سايباها لحد دلوقتي كرمًا مني علشان الأيام السودة اللي عشتها معاكم.
طارق قرب مني وعلامات الغضب والغل مالية وشه وزعق
مروة.. إنتِ زوّقتيها قوي وعملتِ لها حكاية! أختي هند ظروفها وحشة اليومين دول ومش قادرة تدفع إيجار برا، والشقة هنا مركونة ومحدش بيستفاد منها، لما تقعد فيها كام يوم جرى إيه يعني؟ لازم قلة الأصل والنفسية السودة دي وتطلبي البوليس لأختي؟ إنتِ مفيش في قلبك رحمة ولا أصل؟
بصيت لمنظره وهو بيتكلم بكل ثقة وبجاحة وقلت وأنا بضحك باستهزاء
طارق .. افتح ودانك دي واسمعني كويس. الشقة دي بفلوس تعبي وشقايا لوحدي قبل ما أكتب كتابي عليك. السجل العقاري والعقد المسجل مفيش فيهم غير اسم مروة الشناوي. أنا بأي حق وبأي صفة أسيب شقتي لوحدة بتلعب قمار وعليها ديون تتبهدل فيها؟ وتجيب لي شلة صيع وسوابق يوسخوا الشقة ويقلبوها غرزة؟
وش طارق اسود وبقى شكله يرعب، وبص لي بنظرة كلها تهديد ووعيد وقال بصوت واطي ومخيف
مروة.. بلاش تسوقي فيها وتفتكري نفسك هانم! إنتِ طالما دخلتِ بيت الألفي، يبقى لحمك وفلوسك وشقتك وكل ما تملكي بقى ملك لبيت الألفي! أختي لما تتنازل وتقعد هنا ده شرف ليكِ! اخلصي دلوقتي واطلبي البوليس الغي البلاغ، وانزلي على ركبك اعتذري لأختي وبوسي رأسها، وأنا هعدي الليلة دي.. وإلا، وعهد الله، رجلك مش هتعتب باب بيتي تاني وهرميكِ رمية الكلاب!
ما قدرتش أمسك نفسي وضحكت ضحكة عالية كلها قرف
باب بيتك؟ أنت فاكر نفسك عايش في قصر عابدين ولا إيه يا حبيبي؟ ده أنا بدعي ربنا في كل سجدة ينجيني من وشوشكم الفقر دي ويبعدني عنكم مسافة السير والراجع!
في اللحظة دي، الأسانسير فتح وخرج منه اثنين أمناء شرطة وظابط
مين هنا اللي طلب النجدة وعمل البلاغ؟
قربت منهم وأنا شايلة بنتي وقلت
أنا يا فندم، أنا صاحبة البلاغ. الناس دول غيروا الباسورد بتاع شقتي ودخلوها عافية وبدون إذن، وقاعدين فيها بلطجة وبيرفضوا يخرجوا.
الظابط بص على المنظر وجوا الشقة والبهدلة، وبص لطارق وحماتي اللي واقفين في الطرقة وقال
وإنتوا تقربوا إيه لصاحبة الشقة؟
طارق طلع بسرعة وابتسم بوجل، وطلع علبة سجاير وبيمد إيده يعزم على الظابط
يا فندم الموضوع سوء تفاهم بسيط والله والعيلة مع بعضها، دي مراتي وأم بنتي، واللي جوه دي أختي الشقيقة. مشكلة عائلية وبسيطة وهنحلها ودي دلوقتي حالا، ومفيش أي حاجة تستدعي القلق.
الظابط زق إيد طارق وعلبة السجاير بصرامة وقال
طالما مشاكل عائلية ملوش لزمة تطلبوا النجدة وتعطلوا الشغل وتضيعوا وقت الشرطة في كلام خايب.
طلعت تليفوني بسرعة وفتحت تطبيق مصر الرقمية وجبت عقد الشقة الإلكتروني الموثق وحطيته قدام عين الظابط
اتفضل يا فندم، الشقة دي ملكي ملكية خاصة ومسجلة باسمي من قبل الجواز، وملهاش أي علاقة بيه أو بعيلته. وأنا بقولها قدام حضرتك أهو أنا مش موافقة إن الأشكال دي تقعد في بيتي دقيقة واحدة، ولو مخرجوش دلوقتي، يبقى دي قضية اقتحام مسكن عافية وسرقة.
الظابط أول ما شاف المستندات الرسمية والتوثيق، وشه بقى جاد جداً، ولف ل هند والصيع اللي جوه وزعق بصوت هز المكان
صاحبة المكان مش عايزة حد في شقتها. لمّوا حاجتكم كلكم واطلعوا برا حالاً ومن غير مطرود!
هند أول ما سمعت كلام الظابط، دمها هرب من وشها وبقت تترعش، بس فضلت قاعدة في الأرض وبتعاند
مش هخرج! دي شقة أخويا وهو حر فيها! بأي حق تخرجوني من بيت أخويا؟
الظابط صوته بقى حاد زي السكينة وقال
لو لميتي نفسك وخرجتِ بالذوق وبدون شوشرة هيكون أكرم لك، وإلا هنضطر نستخدم القوة الجبرية ونأخذك على القسم بملابس البيت دي!
ال صيع الشغالة اللي جوه أول ما شافوا الحكاية فيها حجز وقسم، خافوا على نفسهم وجريوا على السلم زي الفئران. هند لما لقت نفسها لوحدها وصحابها باعوها، قامت تجري وتلم في شنطتها وهي بتبرطم وتسب وتلعن بأوسخ الألفاظ.
طارق وقف يبص لي وعيونه حمرا زي الدم وفيها غل مش طبيعي، وقعد يجز على سنانه وقال بوعيد
مروة .. أنتِ طلعتِ حرباية وقليلة أصل! طالما وصلتيها للبوليس وطردتِ أختي في الشارع، يبقى ورقتك هتوصلك وبكرة هنطلق، وحياة أمي، بنتك دي مش هتشوفي ضفرها تاني وهأخذها منك وأحرمك منها طول عمرك!
بصيت في عينه بكل قوة وتحدي وقُلت بوضوح
ده أنا ببوس
