زين وساره
“يا نور عيني يا سارة…
عارف إنك هتتضايقي مني وهتقولي جدو ظلمني. بس اسمعيني للآخر.
أنا عارف زين من وهو عيل عنده 8 سنين، بيجي يخبط عليا يقولي طنط مش موجودة ينفع أقعد معاك. الواد ده اتربى على إيدي بعد ما أبوه مات. وكنت بشوفه بيبصلك ازاي وانتي مش واخدة بالك.
هو رخم؟ آه رخم. بس بيرخم على اللي بيحبه بس.
اللي يشيل أمك في نص الليل ويقعد جنبك في المستشفى من غير ما يطلب شكر، ده راجل يا سارة.
واللي يصورك من بعيد وانتي بتضحكي عشان يحتفظ بالصورة، ده بيحبك من زمان.
أنا مش بجوزك غصب، أنا بحطك في إيد أمينة، في إيد واحد أنا مربيه وعارف إنه هيصونك حتى لو انتي فضلتي تقولي عليه رخم.
المفتاح ده مفتاح شقتكم انتو، أنا كتبتها باسمك انتي وهو. لو حبيتيه خدي المفتاح، لو ماحبتيهوش ارميه في وشه وقوليله جدو قال عليك واد رخم.
بحبك يا عش العصافير بتاعتي.
جدو سامي”
دموعي نزلت غصب عني. بصيت على زين لقيته مديني ضهره وبيبص من الشباك عشان مايشوفش دموعي.
قلتله: “يعني انت كنت بتصورني من وانا صغيرة؟ يا نهار اسود ده انت stalk رسمي!”
لف وضحك ضحكته اللي كنت بكرهها وبقيت بحبها: “كنت بتدربي على التصوير، وكنتي أسهل موديل، بتعملي وشوش غريبة طول الوقت.”
مسحت دموعي وقلتله: “وصور الأسانسير؟ كنت خايف بجد؟”
سكت شوية وقال بصوت واطي أول مرة أسمعه صادق كده من غير تريقة:
“أنا اترعبت. لما سمعت صوتك بتعيطي جوا حسيت قلبي هيقف. ساعتها بس عرفت إني مش هعرف أسيبك لحد تاني، حتى لو بتكرهيني.”
قعدنا على الكنبة، الشقة هادية، وصوت فيروز طالع من اللابتوب بتاعه.
قال: “بصي يا سارة، عشان نبقى واضحين. الوصية دي انا ممكن أروح أتنازل عنها بكرة الصبح عند المحامي وتاخدي كل حاجة. انا مش عايزك تتجوزيني عشان ورقة. جدو كان عايز يطمن عليكي مش أكتر.”
بصتله وقلت: “ومين قال إني هتنازل؟ دي شقة في الزمالك، انت عبيط؟”
ضحك جامد: “يا مادية!”
قلتله: “وبعدين انت فاكر إني لسه بطيقك؟ أنا… يعني… اتعودت على رخامتك خلاص. وبعدين مين هيشيل ماما معايا لو تعبت تاني؟”
قرب المج بتاعه مني وقال: “يعني موافقة تبقي مرات الرخم؟”
قلتله: “موافقة أبقى مرات ابن الجيران اللي قصادنا اللي كل بنات المنطقة هتتجنن عشان سابهم واخد عش العصافير.”
سكتنا شوية، وبعدين قال وهو بيبص للصور اللي على الحيطة:
