3 سنين ج2 علي ابو الدهب
موريس: يا فندم الشحنة دي لازم تخلص النهاردة، مش عايز أي تأخير في المينا.
فريدة بصوت جاد ومستعار: تمام يا فندم، أوراقك كاملة، بس محتاجين توقيعك بالاسم الجديد.. أقصد الاسم التجاري الحالي.
أحمد اتهز للحظة.. بص في عينيها ورا النظارة الكبيرة كأنه بيحاول يفتكر الصوت أو الملامح، بس فريدة كانت باردة زي التلج وبصت في الورق بكل احترافية. أحمد وقع الورق ومشي، وهو مش داري إن الست اللي لسه مكلمها هي نفسها اللي سابها بتصارع الفقر والدكاترة عشان تعالج ابنها من الصدمة.
فريدة بدأت تجمع المستندات الحقيقية.. صور من توقيعه القديم وتوقيعه الجديد، وبدأت تسرب أدلة لجهات التحقيق بطرق سرية عن عمليات مشبوهة وتلاعب في فواتير الشحن بيعملها أحمد من ورا كاميليا نفسها عشان يعمل لنفسه ثروة خاصة بيه.
مازن بقى عنده 12 سنة. مابقاش يرسم بيوت من غير أبواب.. بقى يرسم بيوت قوية، وليها حيطان من حديد. فريدة كانت جهزت كل حاجة، الق*ضية بقت كاملة في النيابة، وباقي التكة الأخيرة.. الفضيحة والمواجهة اللي تكسر كبريائه وتخليه يدفع تمن كل دمعة نزلت من ابنه.
شركة كاميليا نظمت حفلة سنوية ضخمة في أكبر فنادق شرم الشيخ بمناسبة مرور 5 سنين على تأسيس فرعهم الجديد. فريدة قدرت تدخل الحفلة بصفتها ممثلة لشركة الشحن الكبيرة، بس المرة دي مكنتش لابسة نظارة.. كانت لابسة فستان أسود أنيق، ورافعة راسها، ومازن واقف جنبها ببدلة كاملة كأنه راجل مسؤول.
أحمد كان واقف في وسط القاعة بيتفشخر بالسيجار وبيدير حوارات مع رجال الأعمال، وكاميليا جنبه متبخترة بجمالها. وفجأة، عينه جت في عين فريدة.
الكوباية وقعت من إيده واتكسرت على الأرض.. الوش الخاسس والشعر الشايب بقوا أبيض زي الملاية في ثانية واحدة لما شاف فريدة، ولما شاف مازن.. ابنه اللي سابه وهو طفل مش فاهم حاجة، ودلوقتي واقف بيبص له بنظرة حادة كلها كبرياء.
أحمد انسحب بسرعة من وسط الناس وخرج للجنينة ورا القاعة عشان ياخد نفسه، وفريدة ومازن مشيوا وراه بكل هدوء.
أحمد وهو بيلتفت ومرعوب: فريدة؟! إنتي.. إنتي إيه اللي جابك هنا؟ وإزاي؟
فريدة بكل برود وقوة: بقالي 3 سنين مستنية اللحظة دي يا أحمد.. يا موريس.. يا اللي موت نفسك في المحاضر وعيشتنا في وهم عشان تهرب بجلدك وتعيش على قفا ست تانية.
