عقاب ١٨ سنه انجي الخطيب
هزيت راسي والدموع نزلت تاني:
— “بس أنا كنت مراتك يا خالد. كنت شريكتك. مش كنت مدرسة وبفهم؟ مش كنا بنحب بعض قبل كل دا؟ إزاي هان عليك تسيبني آكل في نفسي؟ كنت بشوف نظرات الشماتة في عين سلفتي بعد موت حماتي، وكأن الكل عارف إنك بتعاقبني، وأنا كنت باصة في الأرض ومستحملة عشان قولت أنا غلطت في أمه ولازم أدفع التمن.”
خالد اتنهد نهدة طويلة طلعت من ضلوعه:
— “سلفتك مكنتش عارفة حاجة… ولا حد كان عارف. أنا اللي كنت موهم نفسي إن الناس شيفاني كدا. أنا لما شوفتك بتضربي أمي، الشيطان عماني، وقولت في نفسي دي ست قوية ومفترية ومبترحمش… ولما تعبت بعدها بكام يوم، قولت ربنا أخد حقي منها وحق كرامتي اللي اتهانت بمرضي، بس أخدها بالطريقة الغلط. بدل ما أواجهك وأقولك أنا تعبان، استسهلت دور الراجل المجروح اللي واخد موقف… كنت بداري عجز بدني… بعجز نفسي ألعن منه.”
قربت منه، ولأول مرة من تمنتاشر سنة، حطيت إيدي على كتفه. كتافه اللي كانت دايماً مشدودة وكبرياءه اللي كان زي الحيطة، لاقيتها النهاردة بتترعش تحت إيدي.
— “خالد… العمر عدي، والولاد اتجوزوا وشافوا حياتهم، ومبقاش فاضل في الدنيا دي غيري أنا وأنت… الوجع اللي عيشناه كفاية عليه كدا. أنا مسامحاك على الخوف والجبن، ومسامحاك على كل ليلة نمت فيها وضهري ليك وأنا دمي محروق… بس بشرط.”
بص في عيني، ونظرة الخوف اللي كانت في العيادة بدأت تختفي ويحل مكانها رجاء:
— “شرط إيه يا إيمان؟”
— “الأوضة اللي جوة دي… أوضة الضيوف… تتقفل من النهاردة. الشخير اللي كنت بتكدب بيه، أنا عايزة أسمعه… وعايزة أحس إن فيه بني آدم عايش معايا في البيت، مش شبح.”
خالد مبقاش قادر يمسك نفسه، وطى راسه على كتفي وبكى… بكى بكاء راجل شال حمل جبل تمنتاشر سنة ونزله فجأة. وأنا حضنته، حضنته بكل السنين اللي فاتت، بكل الدفا اللي كان ناقص سريرنا الواسع.
الشاي برد على الترابيزة، والمج الأزرق ملمسناهوش… بس لأول مرة من تمنتاشر سنة، البيت مكنش صامت… كان فيه صوت دقات قلبين بيحاولوا يبدأوا من جديد، حتى لو كان اللي باقي من العمر أقل من اللي راح.
*********
فضلنا قاعدين كده، ضاممني وضامّاه، وصوت عياطه بيهز ضلوعي. لأول مرة أحس إن الجبل اللي كان واقف قدامي طول السنين دي انهد، وطلع من تحته إنسان لحم ودم، ضعيف ومكسور ومحتاج الحنية زي ما أنا كنت محتاجاها بالظبط.
