سر البرواز ج١

أخـت جـوزي جابتـلنا بـرواز هـدية فـرحنا… وبعد الجـواز اكتـشفت السـر اللي دمّـر حـياتنا!!!!!!! أنا اسمي نور، عندي ٢٧ سنة، ومتجوزة من أدهم بقالي حوالي ٨ شهور. أدهم كان بالنسبالي الزوج اللي أي بنت تتمناه، هادي وطيب وبيحبني، وعمره ما زعلني بكلمة. بس مشكلتي من أول يوم جواز كانت مع أخته الكبيرة، نادية، اللي عايشة بره مصر، ومع أمه وأخته الصغيرة، سمر. نادية كانت مسافرة بقالها سنين، ومكنتش موجودة في فرحنا، بس بعتت مع مامتها هدايا كتير لينا، وكان من ضمنهم برواز شيك جدًا، فيه إضاءة وزينة دهبي، شكله غالي ومميز. حماتي أول ما دخلت بيه الشقة قالتلي: دي هدية نادية يا حبيبتي، هي اللي مختاراهالك مخصوص، وقالتلي لازم يتحط في أوضتكم. ابتسمت وقلت لها:ربنا يخليها، ده شكله جميل أوي. قامت حماتي ماسكة البرواز ولفت في الأوضة، وبعدين وقفت في حتة معينة فوق الكومود وقالت: لأ، هنا أحلى، نادية قالتلي المكان ده بالذات. استغربت شوية، بس قولت يمكن عشان شكل الديكور، وساعدتها تعلقه، ومن ساعتها البرواز بقى جزء من أوضتنا. في الأول، كل حاجة كانت طبيعية، لحد ما بدأت ألاحظ حاجات غريبة. كنت مثلًا أتكلم مع أدهم في موضوع بينا، وأقوله إني نفسي نسافر يومين إسكندرية، وبعدها بيومين ألاقي حماتي بتقولي: هو إنتوا ناويين تسافروا إسكندرية؟ طب ما تاخدوني معاكم يا ابني! أبص لأدهم باستغراب، وهو نفسه يستغرب ويقول: عرفتي منين يا ماما؟ ترد بكل بساطة: يا حبيبي، أنا أمك، مش لازم أعرف كل حاجة؟ وكنت أعدّي الموضوع وأقول يمكن أدهم هو اللي حكى لها. لكن الموضوع اتكرر بطريقة خلتني أبدأ أشك. مرة كنت بقول لجوزي إني مضايقة من تصرف معين حصل من سمر، وإن نفسي نتكلم معاها بهدوء عشان متزعلش. بعدها بيوم، سمر دخلت علينا وهي بتضحك وقالتلي: إيه يا ستي، هو أنا عملتلك إيه عشان تشتكيني لأدهم؟ اتجمدت مكاني، وبصيت لأدهم، لقيته هو كمان مستغرب. قولتلها: أنا مشتكتش لحد، أنا كنت بتكلم مع جوزي في موضوع بينا. ضحكت وقالت:يا بنتي بهزر معاكي، إنتي مكبرة الموضوع ليه؟ بس أنا من جوايا مكنتش مرتاحة. بقلم مـنال عـلي وبدأت ألاحظ إن كل ما نتفق أنا وأدهم نخرج لوحدنا، نلاقي حماتي وسمر فجأة جاهزين ومستنيينا. مرة كنا متفقين نروح نتعشى بره، وكنت لسه بلبس، لقيت أدهم بيقولي: ماما بتقول إنها هي وسمر تحت، وعايزين يخرجوا معانا. قولتله بضيق: هو إحنا مش من حقنا نخرج لوحدنا يا أدهم؟ بصلي وقال: معلش يا حبيبتي، دي أمي وأختي، مش هينفع أنزلهم وأقولهم لأ. نزلنا معاهم، بس طول الطريق كنت حاسة إن في حاجة غلط. وفي مرة تانية، كنت قاعدة مع أدهم في الصالة، وبقوله إني عايزة أغير شوية حاجات في أوضتنا، وأشيل البرواز اللي فوق الكومود عشان حاسة إنه مش مناسب للمكان. لقيته اتضايق وقال: ليه يا نور؟ ده هدية نادية، وبعدين شكله حلو. قولتله: ما أنا مش هرميه، هحطه في مكان تاني. رد بسرعة: سيبيه زي ما هو، عشان خاطري. استغربت من تمسكه بيه، بس مردتش أجادله. ومع مرور الأيام، بدأت أحس إن حماتي وبناتها عارفين عني تفاصيل أكتر من الطبيعي، وإن أي كلمة بقولها لجوزي بتوصل لهم بطريقة أو بأخرى. حصري علي روايات واقتباسات لحد ما في يوم، كنت راجعة من عند أمي، وطلعت السلم بهدوء، ولما وصلت قدام شقتنا سمعت صوت جاي من أوضة سمر اللي كانت عندنا. كانت بتتكلم في التليفون وبتضحك. وقفت من غير ما أقصد، وسمعتها بتقول: أيوه يا نادية، أنا شايفاهم كويس، أهو قاعدين في الصالة. قلبي دق بسرعة. بقلم مـنال عـلي نادية؟ شايفاهم إزاي؟ قبل ما ألحق أفهم، الباب اتفتح فجأة، وطلعت سمر قدامي وهي ماسكة موبايلها. أول ما شافتني، اتخضت وقفلت الشاشة بسرعة. قولتلها: مالك؟ إنتي اتخضيتي ليه كده؟ قالت بتوتر: ولا حاجة، كنت بكلم نادية. بصيت للموبايل في إيديها، وحسيت إن في حاجة مش طبيعية. دخلت شقتي، ولقيت أدهم قاعد بيتفرج على التلفزيون. لمحة نيوز حكيتله اللي حصل، لكنه ضحك وقال: يا نور، إنتي بقيتي تشكي في كل حاجة! دي أختي بتكلم أختها، فيها إيه يعني؟ سكت، بس الشك اللي جوايا مراحش. بعدها بكام يوم، حصل موقف خلاني أبدأ أربط كل الخيوط ببعض. كنت عند أخويا في المحل، وهو كان مركب كاميرات مراقبة على الموبايل، وبيتابع المحل من خلال برنامج معين. وأنا قاعدة جنبه، لقيته فاتح التطبيق، فقلتله:هو البرنامج ده بيشتغل إزاي؟ شرحلي، ووراني إزاي يقدر يشوف الكاميرات لايف من أي مكان. وأنا ببص على الشاشة، لمحت شكل برنامج شبهه جدًا على موبايل نادية، اللي كانت عاملة مكالمة فيديو مع حماتي. ساعتها افتكرت كل حاجة. البرواز. الكلام اللي بيتنقل. الخروجات اللي بيتدخلوا فيها. والتصرفات الغريبة اللي بتحصل كل ما أبقى لوحدي مع أدهم. رجعت البيت وأنا قلبي مقبوض، وفضلت طول الليل أفكر. تاني يوم، كنت داخلة أوضتنا أجيب حاجة، ولقيت البرواز منور رغم إننا كنا مطفين النور. قربت منه، وبصيت فيه كويس. كان فيه جزء صغير أسود مستخبي بين الزينة، عمري ما لاحظته قبل كده. مديت إيدي ألمسه، وفجأة سمعت صوت سمر من ورايا: إنتي بتعملي إيه يا نور؟ اتخضيت ولفيت لها. كانت واقفة عند الباب، ووشها متغير. قولتلها: ولا حاجة، كنت بشوف البرواز ده ليه بينور لوحده. قالت بسرعة:سيبيه، ده كده طبيعي، نادية قالت إن فيه إضاءة بتشتغل لوحدها. بس أنا المرة دي مكنتش مصدقاها. استنيت لما خرجت، وقعدت أراقب البرواز من بعيد. وبعد شوية، سمعت صوت إشعار جاي من موبايل سمر اللي كانت سايباه في الصالة. بصيت على الشاشة من غير ما ألمسه، ولقيت إشعار من برنامج كاميرات. وفي نفس اللحظة، افتكرت كلام أخويا عن إن البرنامج بيقدر يعرض الصورة لايف. جسمي كله اتنفض. دخلت أوضتنا، ووقفت قدام البرواز، وبصيت في الجزء الأسود الصغير. وقتها اتأكدت إن الموضوع مش مجرد شك. كان فيه عدسة صغيرة مستخبية جوه الزينة! حطيت إيدي على بقي، وحسيت إن الأرض بتلف بيا. يعني إيه؟! يعني في حد بيشوف أوضتي؟! يعني كل اللحظات الخاصة بيني وبين جوزي ممكن تكون اتكشفت؟! طلعت أجري على أدهم، وكان لسه راجع من الشغل. مسكت إيده وقلتله وأنا بترعش: أدهم، لازم تيجي معايا أوضتنا حالًا. بصلي بقلق وقال: مالك يا نور؟ في إيه؟ دخلته الأوضة، وشاورت على البرواز. ـ بص كويس كده… إنت شايف إيه؟ قرب منه، وبص باستغراب. ـ برواز! ماله؟ قولتله والدموع في عيني: فيه كاميرا يا أدهم! ضحك ضحكة عصبية وقال: كاميرا إيه؟ إنتي بتقولي إيه؟ ـ والله العظيم يا أدهم، أنا شفتها بعيني! فضل يبصلي شوية، وبعدين قرب من البرواز، وبدأ يفحصه بإيده. وفجأة، وشه اتغير. مد إيده وفتح الجزء الخلفي من البرواز، ولقي جهاز صغير متوصل بسلك رفيع. ساعتها حسيت إن قلبي وقف. أدهم بصلي، وعينيه مليانة صدمة، وقال بصوت واطي: مين اللي عمل كده؟! وقبل ما أرد، سمعنا صوت موبايله بيرن. كانت مكالمة من سمر. رد عليها وهو بيحاول يتمالك أعصابه، وقال: إنتي فين يا سمر؟ تعالي هنا حالًا. بعد عشر دقايق، كانت واقفة قدامنا، ووشها أصفر. أدهم رفع البرواز قدامها وقال: إيه ده يا سمر؟! بصت للبرواز، وبعدين بصتلي، وبدأت تعيط. أنا… أنا مليش دعوة! أدهم صوته علي: أمال مين اللي حط الكاميرا في أوضتي؟! سمر فضلت ساكتة، لحد ما أدهم خطف الموبايل من إيديها وفتح البرنامج اللي عليه. وبمجرد ما ظهرت الصورة على الشاشة، حسيت إن روحي بتتسحب مني. كانت أوضتنا قدامنا… لايف! أدهم فضل يبص للشاشة، وبعدين رفع عينه لسمر. ـ مين كمان عنده البرنامج ده؟! سمر انفجرت في العياط، وقالت جملة واحدة خلت أدهم يتراجع لورا، وخلتني أحس إن المصيبة أكبر بكتير من مجرد كاميرا مستخبية في برواز. بقلم مـنال عـلي قالت: نادية يا أدهم… نادية هي اللي ركبتها، وهي اللي كانت بتتفرج معانا من بره! بس قبل ما نقدر نستوعب كلامها، ظهر إشعار جديد على الشاشة… حصري علي روايات واقتباسات مكالمة فيديو واردة من نادية. وأدهم ضغط على زر الرد. واللي ظهر قدامنا على الشاشة… كان بداية السر اللي قلب حياتنا كلها! #حكايات_منــال_عـلـي

سر البرواز ج١

منى السيد

اترك تعليقاً إلغاء الرد

مقالات ذات صلة

حماتي رمت السمك ج١ زهره

جوزي ومراته السريه ج1 منال علي

صقر وابرار ج٢ حكايات زهره

دكتوره نسا ج٣ اماني السيد

كبير البلد هيتجوز

ينفع اقعد معاك لحد ماما تيجي

اترك تعليقاً إلغاء الرد