ميزانيتك خلصت ج٢ منى السيد
يا دكتور، طمني. حط قدامي ملفين الملف الأول التنازل الرسمي عن شاليه هاسيندا اتسجل في الشهر العقاري باسم حضرتك، ومروة مضت وهي بتبكي دم. والملف التاني؟ إشعار المحكمة وإشهاد الطلاق الرسمي كريم طلق رسمي النهاردة الصبح في مكتب المأذون، وتنازل عن أي مستحقات، وسلم مفاتيح العربية البي إم ورخصتها لمعرض العربيات عشان نرجع الفلوس لحسابك.
فتحت ورقة الطلاق، بصيت عليها لثواني، وابتسمت من غير ما أحس بأي وجع. كانت مجرد ورقة رسمية بتثبت إني اتطهرت من وباء كان مالي حياتي.
وشقة زايد يا دكتور؟ البنك وضع حراسة قضائية عليها النهاردة الظهر، ونادية هانم وأحمد بيلموا حاجتهم دلوقتي وسط فرجة الجيران في الكومباوند، ومأجرين شقة مفروشة قديمة في فيصل عشان يقعدوا فيها على ما يشوفوا هيعملوا إيه في ديونهم المتلتلة.
سندت ضهري على الكرسي، وبصيت من الإزاز الكبير بتاع مكتبي على شوارع التجمع، وعلى مشروعاتي وعماراتي اللي بتبني اسمي في البلد.
السكرتيرة خبطت ودخلت بشمهندسة مريم، الأوردر بتاع الغدا وصل، طلبنا لحضرتك السالمون المشوي والمقبلات اللي بتحبيها. بصيت للترابيزة، وبعدين بصيت للسكرتيرة وابتسمت من قلبي هاتيه يا شيرين، وحطيه هنا على المكتب. فتحت علبة الأكل، الريحة كانت تجنن، والطبق كان مليان خيرات ربنا، شقايا، عرق جبيني، وفلوسي الحلال اللي محدش ليه فضل عليا فيها بنص جنيه.
مسكت الشوكة، وخدت أول قطمة بروقان، وافتكرت اللحظة اللي نادية حطت قدامي الطبق الفاضي وقالتلي ميزانيتك خلصت عندنا.
ضحكت وقولت لنفسي في سري فعلاً يا نادية ميزانيتي للرخاص خلصت، بس ميزانية كرامتي ونجاحي لسه بتبدأ، والطبق الفاضي ده كان أحسن هدية إنتِ قدمتيهالي في حياتك، لأنه صحاني وشافني وأنا بفرمتكم كلكم من حياتي بأستيكة.
