سطوح الحب

سطوح الحب العمارة بتاعتنا في محرم بك كانت عمارة قديمة بس دافية، كلها خمس ادوار وكل دور شقة واحدة، واللي رابط الناس ببعض مش الاسانسير لانه مكانش فيه اصلا، اللي رابطهم هو السطوح. السطوح ده كان هو النادي والصالون وقعدة الستات والعيال. من الصبح بدري تلاقي صوت ماية وصابون وستات بتزعق انشر الغسيل يابت قبل الشمس ما تروح. في الدور التالت كانت ساكنة طنط سعاد ومعاها بناتها التلاتة، الكبيرة ميرنا اللي عندها دلوقتي اتنين وعشرين سنة، والوسطانية مايان اللي عندها تسعتاشر، والصغيرة حبيبه اللي عندها ستاشر. التلاتة زي القمر بس كل واحدة ليها طعم مختلف. ميرنا الهادية العاقلة اللي شايلة البيت، ومايان الشقية اللي لسانها سابق سنها، وحبيبه الصغيرة اللي لسه بتجري ورا القطط فوق السطوح. وفي الدور الرابع كان ساكن عمو فاروق ومراته وولاده التلاتة، زياد الكبير اللي عنده ستة وعشرين سنة ومتخرج من هندسة وبيشتغل في شركة مقاولات، واسامه اللي عنده اربعة وعشرين ولسه مخلص جيش، وزين الصغير اللي عنده عشرين سنة ولسه في الكلية. احنا كلنا متربيين مع بعض. يعني زياد واسامه وزين كانوا بيلعبوا مع ميرنا ومايان وحبيبه وهم صغيرين استغماية فوق السطوح، وكانوا بيتخانقوا على مين اللي عليه الدور ومين اللي غش. زياد بالذات كان اكبر واحد فينا فكان عامل نفسه الكبير بتاع الشلة، اي واحدة تعيط يجري يجيبلها ماية، اي واحدة تقع يروح يشيلها. بس اكتر واحدة كان زياد بيعتبرها اخته الصغيرة بجد هي ميرنا. ميرنا كانت رفيعة وصغيرة وشعرها كيرلي ومنكوش طول الوقت وكانت لابسة نضارة كبيرة قد وشها. كانت طول النهار ماشية ورا زياد تقوله يا زياد اعملي الواجب، يا زياد شوفلي المسألة دي، وهو كان بيضحك ويقولها يا بت يا معصعصة روحي ذاكري بعيد عني. عمره ما شافها كبنت، كان شايفها عيلة صغيرة بتزن. لحد ما في يوم بابا ميرنا جاله عقد عمل في السعودية، وقرر ياخد مراته وبناته ويسافروا كلهم مرة واحدة. اليوم ده كان صعب اوي على العمارة كلها. السطوح كان فاضي والغسيل مش منشور والعياط شغال في كل حتة. ميرنا كانت عندها سبعتاشر سنة وقتها، لابسة بنطلون جينز واسع وتيشرت بكم وشنطتها على ضهرها وبتعيط. زياد ساعتها كان عنده واحد وعشرين سنة، واقف بعيد ومش عارف يقول ايه. هي جت سلمت عليه وقالتله هتوحشني يا زياد، هتوحشني اوي، وهو ضحك بتوتر وقالها متقلقيش يا ميرنا، خلي بالك من مذاكرتك هناك ومتعمليش دوشة لمامتك، واديها بوسة على راسها زي اخته بالظبط. سافروا. خمس سنين عدوا كأنهم خمسة ايام وكأنهم خمسين سنة في نفس الوقت. العمارة فضلت زي ما هي بس السطوح بقى هادي. مايان وحبيبه كانوا بيجوا اجازات كل سنة مرة بس ميرنا مجتش ولا مرة عشان كانت في ثانوية عامة وبعدين دخلت جامعة هناك وكانت بتدرس. زياد في الخمس سنين دول اتغير. بقى راجل بجد. اشتغل وبقى عنده عربية صغيرة قديمة بس بيحبها، وبقى هو اللي ماسك اتحاد الملاك وبيصلح اي حاجة بتبوظ في العمارة. اسامه اتجوز وخرج من العمارة، وزين بقى في اخر سنة كلية. بس زياد لسه ساكن فوق. وفي يوم من الايام، طنط سعاد رجعت. رجعت هي وجوزها والبنات. وقالوا خلاص استقرينا هنا تاني. الخبر نزل على العمارة زي العيد. الزغاريط اشتغلت والستات طلعت تخبز وتهيص. زياد كان راجع من الشغل تعبان وهدومه كلها تراب، سمع الهيصة طلع يجري على السلم يشوف في ايه. فتح باب السطوح لقى طنط سعاد بتحضن امه، ومايان بقت طولها طوله وشعرها طويل، وحبيبه بقت انسة طويلة ورفيعة. وعينه بتدور على ميرنا. فين ميرنا المعصعصة ام نضارة. وفجأة سمع صوت من وراه بيقول بسم الله الرحمن الرحيم ايه الزحمة دي كلها. لف. شافها. ميرنا واقفة على باب السطوح، لابسة جيبة قصيرة شوية وفوقها بلوزة بيضا مفتوحة من عند الكتف، وشعرها اللي كان منكوش بقى ناعم وطويل ومفرود، والنضارة راحت وعنيها بقت واسعة ومكحلة، وحاطة روج احمر خفيف، وريحتها مالية السطوح كله. بقت موزة. موزة بجد زي ما البنات بتقول. زياد اتسمر مكانه. بقه مفتوح. هو ده ميرنا؟ معقولة؟ البت اللي كان بيقولها يا معصعصة بقت كده؟ ميرنا شافته وضحكت ضحكة كبيرة وقالت ايه ده زياد؟ مش هتسلم ولا ايه؟ كبرت وخدت مقلب في نفسك ولا ايه يا باشمهندس؟ زياد بلع ريقه بالعافية وقال اهلا اهلا يا ميرنا، حمدالله على السلامة، كبرتي. مايان من وراه بتضحك وبتقول كبرت بس؟ دي بقت احلى واحدة في اسكندرية كلها يا زياد، ده انت هتشوف. من اليوم ده والسطوح رجع لحياته تاني. بس حياة مختلفة. طنط سعاد كل يوم تطلع تنشر الغسيل وتنده للبنات، يا ميرنا يا مايان يا حبيبه تعالوا ساعدوني الشمس هتاكل الغسيل. والتلاتة يطلعوا يهزروا ويضحكوا وصوتهم يجيب اخر الشارع. زياد بقى مدمن سطوح. اللي كان بيطلع السطوح مرة في الشهر عشان يصلح الدش، بقى طالع نازل عشرين مرة في اليوم. مرة طالع يشوف الماية، مرة طالع يظبط السلك، مرة طالع يشوف الهوا اخباره ايه. وامه تقوله يا واد انت اتهبلت؟ ما السطوح زي الفل بقاله خمس سنين اهو. وهو ولا همه. عينه مش بتنزل من على ميرنا. ميرنا وهي بتنشر، وهي بتلم الغسيل، وهي بتضحك مع اخواتها. كل حاجة بقت بتعصبه. ازاي لابسة شورت قصير وهي بتنشر؟ ازاي البلوزة دي مبينة كتفها؟ ازاي بتضحك بصوت عالي كده وكل العمارة سامعة؟ بقى يغير عليها من طوب الارض. لو زين اخوه طلع السطوح وهزر معاها، يبصله بصة تخليه ينزل جري. لو ابن البواب طلع يجيب حاجة، يقوله انزل انا هجيبهالك. حتى اسامه لما كان بيجي يزورهم ويطلع يسلم على البنات فوق السطوح، زياد كان بيقف زي الحارس. ميرنا في الاول مكنتش واخدة بالها. كانت فاكرة انه لسه بيعاملها زي اخته الصغيرة وبيخاف عليها. لحد ما في يوم كانت طالعة تنشر لوحدها، لابسة فستان خفيف صيفي قصير شوية عشان الحر كان نار. لسه بتعلق اول حتة غسيل، لقت زياد طالع يجري ونفسه مقطوع. قالها ايه اللي انتي لابساه ده؟ قالتله فستان. قالها فستان ايه اللي طالعة بيه السطوح ده؟ انزلي غيريه حالا. ميرنا اتصدمت وقالتله نعم؟ انت بتكلمني كده ليه؟ وانت مالك اصلا لابسة ايه ومش لابسة ايه؟ قالها انا مالي؟ انا زي اخوكي الكبير ومن حقي اخاف عليكي، السطوح ده مفتوح وكل العماير شايفانا وانتي لابسة كده. ميرنا ضحكت ضحكة مستفزة وقالتله اخويا؟ لا يا شيخ؟ من امتى؟ انت من ساعة ما رجعت وانت بتبصلي بصة غريبة وعمال تتحكم فيا، لا يا حبيبي فوق لنفسك، انا مبقتش العيلة الصغيرة ام نضارة اللي كنت بتضحك عليها. زياد اتعصب اكتر لما قالتله كده، قرب منها وقالها اه مبقتيش صغيرة، ما انا شايف، شايف اوي كمان، وده اللي مجنني، فاهمة؟ وسابها ونزل. عارفة ان اختها بتحب زياد من زمان. فكانت كل شوية تروح تقول لميرنا ايه يا بت يا ميرنا مش هتخلصينا بقى وتقوليله، ده الواد هيطق. وميرنا تقولها اسكتي يا مايان انتي اللي هتفضحيني. ومايان تروح لزياد من ورا ميرنا وتقوله ما تسترجل يلا وتقولها، ده انت لو استنيت اكتر من كده هتطير منك. وزياد يقولها اطير ازاي يعني، ده انا قافل السطوح عليها بالمفتاح. ومايان تضحك وتقول قافل السطوح بالمفتاح، يا لهوي على الرومانسية. وحبيبه الصغيرة كانت هي الحمامة الزاجلة بتاعة الحب. تطلع لميرنا تقولها زياد كان بيسأل عليكي تحت، وتنزل لزياد تقوله ميرنا كانت واقفة في البلكونة بتبص عليك. وزين كان فاهم اللعبة كلها وقاعد بيتفرج ومستمتع. زين كان صاحبه اوي لزياد بس كان بيحب ميرنا زي اخته، فكان ساعات يغيظ زياد عشان يشوف غيرته. يطلع السطوح ويقول لميرنا ايه الحلاوة دي يا ميرنا، ايه الجمال ده، وزياد يبقى واقف تحت سامع صوته يطلع يجري زي المجنون يقوله انت بتعمل ايه عندك يا زين، انزل يلا، وزين يضحك ويقول يا عم بهزر مع اختي، مالك قفشت كده ليه. طنط سعاد كانت حاسة بكل حاجة بس سايباهم. هي كانت بتحب زياد جدا وكانت شايفاه راجل محترم ويستاهل ميرنا. وعمو فاروق نفس الحكاية، كان كل ما يشوف زياد يقوله شد حيلك يا واد، البت كبرت وهتتخطف منك، وزياد وشه يحمر ويقول يا عمو فاروق متقولش كده، دي ميرنا دي بنتي. وامه بقى كانت هتموت وتفرح بيه، كل شوية تقوله يا زياد ما تشوفلك عروسة بقى، وهو يقولها ما العروسة قدامك اهي يا ماما بس انتي مش واخدة بالك. وفي يوم جمعة، العمارة كلها كانت متجمعة فوق السطوح بيشووا درة وبطاطا. ده كان طقس مقدس عندنا كل شهر مرة. كل الستات تطلع تعمل شاي، والرجالة تظبط الفحم، والعيال الصغيرة تجري. ميرنا كانت قاعدة جنب مايان وحبيبه، لابسة بنطلون ابيض واسع وبلوزة صفرا، وشكلها زي الشمس. زياد كان قاعد بعيد مع الرجالة بس عينه عليها. كل شوية واحد من الجيران يقول لميرنا نورتينا يا بنتي، ده انتي بقيتي عروسة زي القمر، وزياد يولع من جواه. جه واحد اسمه محمود ساكن في العمارة اللي قصادنا، طلع معاهم عشان كان صاحب زين، وقعد جنب ميرنا وقالها على فكرة انا شفتك وانتي راجعة من الكلية امبارح، ما شاء الله بقيتي جميلة اوي. زياد مقدرش يمسك نفسه، قام مرة واحدة وقال بصوت عالي يلا يا جماعة الشمس راحت ولازم ننزل، والدرة اتحرقت اصلا. كل الناس بصتله مستغربة، وميرنا فهمت انه غيران وقامت ضاحكة وقالت عنده حق يلا ننزل. بعد ما نزلوا، زياد فضل قاعد لوحده فوق السطوح متضايق. ميرنا حست بيه، طلعت تاني بعد شوية لقيته قاعد على سور السطوح وحاطط وشه بين ايديه. قربت منه وقالتله مالك يا زياد، زعلان ليه. قالها زعلان عشان انا مش عارف اكون جنبك زي ما انا عاوز، كل الناس بتبصلك وانا مش عارف اقولهم دي بتاعتي، دي حبيبتي من وانا صغير. قالتله طب ما تقول. قالها اقول لمين. قالتله قولي ليا انا الاول. فبصلها وضحك وقالها ما انا بقولك كل يوم بغيرتي وبخنقتي وبمنعي ليكي تطلعي السطوح، هو ده مش حب. قالتله لا، الحب مش منع، الحب ثقة، لو بتحبني بجد سيبني اطلع وانزل براحتي واعرف اني ليك انت لوحدك. الكلام ده هز زياد اوي. فضل يفكر فيه طول الليل. تاني يوم الصبح، ميرنا طلعت تنشر الغسيل كالعادة، لقت زياد طالع وحاطط ايديه في جيوبه وساكت. قالها صباح الخير يا ميرنا. قالتله صباح النور. قالها على فكرة انتي النهاردة طالعة زي القمر، والفستان ده حلو اوي عليكي، انشري براحتك وانا هقف من بعيد احرسك بس، مش هقولك غيري ولا شيلي ولا حطي. ميرنا اتفاجئت وفرحت اوي، وحست انه اخيرا فهمها. وفي يوم كانت الدنيا مغيمة والغسيل كتير وطنط سعاد تعبانة، فميرنا طلعت لوحدها تلم الغسيل قبل المطر ما ينزل. كانت السما غامقة والهوا شديد. فجأة المطر نزل جامد جدا مرة واحدة. ميرنا اتخضت والغسيل طار. بقت تجري تلم الغسيل والماية نازلة عليها وهدومها اتبلت كلها ولزقت في جسمها. زياد كان واقف في البلكونة شاف المنظر ده، قلبه وقع في رجليه. جري زي المجنون على السطوح من غير حتى ما يلبس شبشب. طلع لقاها بتعيط عشان الغسيل كله اتبهدل وطار. من غير ما يتكلم، قلع الجاكيت اللي كان لابسه وحدفه عليها عشان يغطيها، وبدأ يلم معاها الغسيل بسرعة. دخلوا الغسيل كله تحت التندة الصغيرة اللي فوق السطوح ووقفوا الاتنين بياخدوا نفسهم والمطر نازل حواليهم. ميرنا كانت بترتعش من البرد والماية نازلة من شعرها على وشها. زياد بص لها ومقدرش يمسك نفسه اكتر من كده. قالها يا ميرنا. قالتله نعم. قالها انا مش عارف اقولها ازاي، بس انا من ساعة ما رجعتي وانا مش عارف انام. انا كنت طول عمري شايفك عيلة صغيرة بجري ورايا، فجأة لقيتك واحدة ست، احلى ست شفتها في حياتي. وبقيت بغير عليكي من الهوا، بغير عليكي من اخويا ومن السما ومن السطوح نفسه. انا عارف اني بتصرف زي العيال وبخنقك وبمنعك تطلعي السطوح، بس والله غصب عني، انا بحبك يا ميرنا، بحبك من وانا عيل صغير ومكنتش فاهم، ودلوقتي فهمت. ميرنا عنيها دمعت وضحكت في نفس الوقت. قالتله يعني انت كل ده بتمنعني اطلع السطوح عشان بتحبني؟ قالها ايوه، عشان السطوح ده بتاعنا احنا بس، بتاع حبنا احنا، مش عاوز حد يشوفك غيري. ميرنا قربت منه وقالتله يا اهبل، السطوح ده طول عمره بتاعنا احنا، من واحنا عيال صغيرة بنلعب عليه، وانا عمري ما حبيت حد غيرك، لا قبل ما اسافر ولا بعد ما سافرت، كنت بلبس وبتشيك عشانك انت، عشان تشوفني كبيرة. زياد ضحك ومسك ايدها وقالها طب ايه رأيك بقى نفضل هنا على طول؟ ومن ساعتها، السطوح بقى اسمه سطوح الحب بجد. ميرنا بقت تطلع تنشر الغسيل وزياد طالع نازل وراها، بس المرة دي مش بيمنعها، بيطلع يساعدها. ومايان وحبيبه وزين بقوا يطلعوا يتفرجوا عليهم ويضحكوا ويقولوا اخيرا، اخيرا المعصعصة اتجوزت الباشمهندس. وطنط سعاد وعمو فاروق اتفقوا على كل حاجة، والعمارة كلها بقت مستنية الفرح اللي هيتعمل فوق السطوح، نفس السطوح اللي شافهم وهم عيال صغيرة بيلعبوا استغماية، وهو هو نفس السطوح اللي هيشوفهم وهم كبار بيحبوا بعض بجد. وفعلا الحب اللي بيبدأ فوق سطوح قديم بيفضل عايش مهما البعد طال ومهما السنين عدت والقلوب بترجع لبعض في الاخر دايما مهما حصل

مقالات ذات صلة

جوزي بيحرجني اماني السيد

طردتني لانى مبخلفش ج٢ نور محمد

حصاد التفضيل ج3 منى السيد

زوجتي العمياء

العريس الغلط والحب الى اخترته بنفسها ج٣

ساحره ج٣ اماني السيد

اترك تعليقاً إلغاء الرد