بنت عم جوزي ج١ اماني السيد
وبعدها بصت لاخوه مش صح يا فادى
اتكلم فادر بتوتر كان حاسس بيه من اول القاعده
ـ اه طبعاً حصل
بعد ما الكل خلص أكل، ساد هدوء تقيل على السفرة، ما قطعهوش غير صوت معتز وهو بيبصلي ببرود ومن غير ما يلتفت لفريدة حتى، وقال بنبرة آمرة وسطهم:
ـ قومي يا إلهام لمي السفرة دي ونضفيها، وادخلي اغسلي الأطباق في المطبخ مع عمتي.
بصيتله والدم غلي في عروقي. الكرامة اللي اتهانت بسبب المعلقة والضحك والملاطفة طول القاعدة صحت جوايا بركان. ساندت إيدي على السفرة، وبصيتله بثبات ورفضت بوضوح:
ـ لأ مش هقوم. عمتك عندها بنتها تقوم تعمل، اشمعنى أنا يعني اللي أقوم وأنظف؟ فريدة قاعدة أهو مش بتعمل حاجة.
لمحت ملامح معتز اتغيرت تماماً، وعروقه برزت من العصبية لإن رفضت كلمته قدامهم، وبصلي بنظرة كلها تقليل واحتقار وقال بصوت عالي:
ـ إنتي مش شايفه إيد فريدة عاملة إزاي وضوافرها؟ فريدة ماتمدش إيدها في حاجة! فريده طول عمرها متعوده على الدلع كل حاجه بتجلها تحت رجلها
الكلمة نزلت عليا زي الصاعقة، وبنت عمه ابتسمت بخبث وهي بتبص لضوافرها المتلونة برقة وتمشي إيدها عليها، وكأنها بتأكد كلامه. بصيت لمعتز ودموعي خلاص هتفر من عيني، بس حبستها وقررت ما أبانش ضعيفة قدام الضحكة الشمتانة اللي في عيون فريدة ونظرات فادي المتوترة.
نظرات فريدة الشمتانة وهي بتمسح على ضوافرها برقة زادت النار اللي جوايا، وصوت ضحكتها المكتومة كان كفيل يخليني أنفجر. بصيت لمعتز وعيني مليانة عتاب وقهر، بس حاولت على قد ما أقدر أحافظ على ثباتي وصوتي ما يرعشش وأنا برد عليه وسطهم:
ـ والهانم ضوافرها تتجرح لو شالت طبق؟ وأنا بقى إيه بنظرها؟ الخدامة اللي جايبها معاك عشان تلم وراكم؟
عمتو لفت وشها الناحية التانية وعملت نفسها مش سامعة، أما فادي فبدأ يفرك في إيده بتوتر وبص لأخوه وقال بنبرة هادية بيحاول يلم بيها الدور:
ـ خلاص يا معتز، حصل خير، ما تلبخش الدنيا.. إحنا قايمين أهو نساعد بعض كلنا.
لكن معتز ما عجبوش كلام أخوه، ووشه اتقلب وغضب أكتر لإن كسرت كلمته قدام فريدة. خبط بإيده على السفرة خبطة خفيفة بس حاسمة، وبصلي بعيون حادة وقال بصوت واطي ومسموع في نفس الوقت:
ـ إلهام! عيب لما تقارني نفسك بفريدة.. فريدة طول عمرها ضيفة في البيت ده وما بتمدش إيدها في حاجة، وإنتي هنا في بيت عمتي يعني المفروض تقومي من نفسك مش تستني حد يقولك. خلصنا.. قومي شوفي وراكي إيه وبلاش حركات النكد دي قدام الناس!
