مراد وقف مكانه كأنه صخرة، عينيه كانت بتطلع شرار، والقميص الأسود اللي كان لابسه بدا يضيق على صدره من كتر ما نفسه عِلي. في ثانية، مسك التليفون ورزع بيه الحيطة دشدشه ميت حتة. أنا رجعت لورا وظهري خبط في زجاج البلكونة، كنت بترعش من فوق لتحت. الصوت اللي في التليفون كان فيه نبرة ثقة مرعبة، كلامه عن مراته الأولى معناه إنها مماتتش موتة ربنا.. دي مقتـ..ـولة! "مراد..." صوتي طلع مخنوق ومش قادرة أقف على رجلي: "مين ده؟ وهي مامت فريدة جرى لها إيه بجد؟" مراد التفت ليا، وشوفته في اللحظة دي على حقيقته؛ الوش التاني لمراد الألفي اللي السوق كله بيترعب منه. قرب مني، مسك كتافي براحة بس بقوة، وعينيه كانت ثابتة في عيني: "نور.. اسمعيني كويس. مفيش مخلوق يقدر يمس شعرة منك طول ما أنا عايش. الكلام اللي سمعتيه ده يتدفن هنا في الأوضة، ومش عايز فريدة تحس بحاجة." "أدفن إيه يا مراد!" صرخت فيه والدموع نزلت غصب عني: "أنت مخبي عليا إيه؟ أنا دخلت بيتك عشان أرضع بنتك، لقيت نفسي في وسط حرب وعصابات! أنا مالي ومال الكلام ده؟" مراد أخد نفس طويل، ورخى إيديه من على كتافي، ولف ضهره ليا وبص للمطر بره، وقال بصوت مخنوق: "أنا مش مجرد رجل أعمال يا نور.. عيلتي زمان كانت داخلة في بيزنس سلا..ح وآثار في الصعيد، وأنا لما كبرت واستلمت الشغل، قفلت كل ده وغسلته، وحولته لشركات مقاولات وحديد واستثمار قانوني ١٠٠٪. بس الماضي مبيسيبش حد في حاله. المنافسين بتوع زمان، وأعداء أبويا، اعتبروا إن نضافتي دي ضعف.. صفّوا مراتي الأولى في المستشفى وهي بتولد فريدة، وبوظوا فرامل عربيتها عشان تتقلب، والدكاترة اضطروا يفتحوا بطنها وهي بتموت عشان يلحقوا البنت." الكلام نزل عليا زي الصاعقة. حطيت إيدي على بوقي وأنا مش مصدقة كمية السواد والغل اللي الناس دي عايشة فيه. مراد لف وبص لي، وعينيه كان فيها رجاء وندم: "أنا لما صممت تتجوزيني وتعيشي هنا، مكنتش بس عايز أم لفريدة.. كنت عايزك في حمايتي. قصر الألفي ده متأمن بأحدث أجهزة في العالم، ورجالتي مبيسيبوش ثغرة. أنتِ هنا في أمان يا نور.. أمان أكتر من الشارع ومن بيتك القديم." لسة باجي أتكلم وأرد عليه، سمعنا صوت صريخ الشغالة جاي من تحت، وصوت ضرب نار حي بره في الجنينة! مراد في جزء من الثانية طلع طبنجة من جيبه ورا ضهره مكنتش واخدة بالي منها. مسكني من إيدي وجرني وراه بسرعة على الأوضة اللي فيها فريدة. شال البنت وهي نايمة، وفتح دولاب سري ورا المراية الكبيرة في الأوضة، وزقني جواه. "أقعدي هنا وماتتحركيش ولا تطلعي صوت مهما حصل.. سامعة؟" قالها وهو بيلقم الطبنجة بتاعته. "مراد.. هتروح فين؟ متسبناش!" كنت بصرخ بهمس وأنا متبتة في فريدة اللي بدأت تعيط من الخوف. بص لي نظرة أخيرة، نظرة مليانة حب وخوف حقيقي، وقال: "أنا قولتلك امبارح.. وعد مراد الألفي عهد. رجلي مش هتعتب بره القصر ده إلا وأنتِ مراتي وفريدة في حضنك.. وأنا هطلع أخلص على الكلاب دول وأقفل الحساب القديم ده بنفسي." قفل الباب السري وضلمت الدنيا عليا أنا وفريدة. بره، صوت ضرب النار كان بيهز حيطان القصر.. صوت الصريخ، وتكسير الزجاج، وصوت خطوت رجيل ثقيلة بتقرب من الأوضة بره. فريدة بدأت تعيط جامد، حطيت إيدي على بوقها براحة وأنا بضمها لصدري وبقرأ قرآن في سري، ودموعي نازلة.. وفي اللحظة دي، عرفت إن لو مراد مِرجعش من المعركة دي.. أنا وبنته هنكون الضحية الجاية. حكايات شروق خالد الصوت كان بيقرب.. خطوات ثقيلة وجري في الصالة اللي برة الأوضة، وصوت تكسير وضرب نار حي مكنش بيفصل. فريدة في حضني كانت بتترعش، وكل اللي قدرت أعمله إني أضمها لصدري وأرضّعها عشان تسكت، كأن لبني هو الحصن الوحيد اللي حاميها وحاميني من الموت اللي برة الدولاب. وفجأة.. الصوت هدي تماماً. مبقاش فيه غير صوت المطر والرعد اللي بيهز القصر. فضلت كاتمة نفسي، عيني مبرقة في الضلمة، ودقات قلبي كانت مسموعة لدرجة خفت للي برة يسمعها. "تك.. تك.. تك.." صوت خطوات هادية وبطيئة دخلت الأوضة. الخطوات وقفت بالظبط قدام الدولاب السري.. قدام المراية! أنا اتجمدت، وفريدة نامت في حضني من كتر الخوف والتعب. حسيت إن روحي بتنسحب مني وأنا مستنية الباب يتفتح وأشوف وش القـاتـل اللي جاي يخلص علينا. "كليك.." المقبض السري لَف.. الباب اتفتح، والنور ضرب في عيني. غمضت عيني من الصدمة، ولما فتحتها.. لقيت مراد واقف قدامي. قميصه الأسود كان متبهدل تراب، وإيده عليها جرح بينزف دم، وماسك الطبنجة في إيده التانية وموجهها للأرض. وشه كان عرقان ونفسه عالي، بس أول ما عينه جت عليا وعلى فريدة، ملامحه هديت تماماً والشر اللي كان في عينه اتمسح. رمى الطبنجة على السرير ونزل على ركبه قدام الدولاب، ومد إيده المبلولة دم مسك بيها رجلي وقال بصوت دافي بس مهدود: "اطلعي يا نور.. اطلعي يا حبيبتي.. خلاص، الكابوس انتهى." خرجت وأنا برجف، شال فريدة مني وحطها على السرير وغطاها، وبعدين لف ليا وأنا كنت بنهار وبطوح. أخدني في حضنه.. حضن قوي لدرجة حسيت إن ضلوعي هتتكسر، وأنا ممسكتش نفسي وبكيت بأعلى صوت عندي، فضلت أضربه في صدره وأنا بصرخ: "كنت هتموت وتسيبنا! أنت إيه اللي رماك في السواد ده؟ أنا كنت هضيع أنا وبنتك!" مراد مسك راسي وباس جبهتي وعينيا، وقال ونبرته فيها كمية ندم وعشق عمري ما شفتها في راجل: "والله العظيم ما كان ينفع أسيبهم يخرجوا عايشين. الكلاب دول كانوا تلاتة من بقايا العصابة القديمة، دخلوا من السور البحري بمساعدة واحد من أمن القصر.. الخاين اتمسح، والتلاتة الباقيين نايمين في الجنينة برة مستنيين النيابة والإسعاف." قعدني على السرير ومسح دموعي بطرف قميصه وكمل: "الصفحة دي اتقفلت للأبد يا نور. الرأس الكبيرة اللي كلمتني في التليفون.. رجالتي جابوه في نفس الدقيقة في الصعيد، ودلوقتي هو في يد الحكومة وقضايا السلا..ح القديمة هتمرجحه للمشنقة. أنا غسلت الماضي ده بدمي النهاردة عشانك أنتِ وفريدة." بصيت للجرح اللي في إيده، قمت بسرعة وجبت علبة الإسعافات البدائية اللي في الحمام. قعدت جنبه وبدأت أطهر له الجرح وأربطه بالـشاش. مراد مكنش باصص للجرح أصلاً، كان باصص لوشي، لـإيديا وهي بترتعش وخايفة عليه. "نور.." قالها بصوت هادي وناعم. "نعم يا مراد؟" قلتها وأنا بربط الشاش. "أنتِ خوفتِ عليا؟" رفعت عيني وبصيت في عينيه السودا الواسعة، وشفت فيهم الأمان اللي ضاع مني من تلات شهور. الخوف اللي عشته النهاردة مكنش بس خوف على حياتي، كان خوف إني أخسر الراجل ده.. الراجل اللي وراني الوش الحنين والرحيم ورا قناع الجبروت. "خوفت يا مراد.. خوفت قوي." قلتها وصوتي اتهز. مراد ابتسم ابتسامة صافية، مسك إيدي اللي بتربط الشاش وباس باطنها وقال: "الوعد اللي وعدتهولك في الطيارة، مكنش سجن يا نور.. كان عهد إني هبقى سندك وأمانك لآخر يوم في عمري. النهاردة الحرب خلصت بجد.. وقصر الألفي مابقاش معتقل، بقا بيتك.. وأنا وفريدة بقينا عيلتك." بصيت لفريدة اللي كانت نايمة في سلام، وبعدين بصيت لمراد، وحسيت إن ربنا لما بياخد غالي، بيعوض بغالي تاني.. أمل جديد اتولد من وسط ضرب النار والموت. ومن الليلة دي، مابقاش فيه ورقة ولا حبر، ومبقاش فيه حارس ومسجون.. مابقاش فيه غير نور ومراد وفريدة.. عيلة واحدة، بدأت في الهوا على ارتفاع ٣٥ ألف قدم، واستقرت على الأرض بأقوى رباط في الدنيا.. رباط الحب والدم والوعد الصادق. وعد على ارتفاع ٣٥ ألف قدم حكايات شروق خالد
