ناكره الجميل ج٢ صافي هاني
كل اللي في الشقة اتجمدوا
حماتي بهت لونها ومسكت طرف الكرسي عشان ماتقعش
نجلاء بدأت تبكي وهي بتحضن بطنها
أما كريم فكان بيبص للباب مرة وليا مرة كأنه بيدور على أي طريق يهرب منه
الخبط زاد
والصوت رجع تاني
افتحوا الباب حالًا
كريم همس بسرعة
ماحدش يفتح
لكن الباب اتفتح قبل ما يكمل كلامه
كان الجيران واقفين في السلم بعد ما سمعوا الخناق
وخلفهم دخل ضابط ومعاه اتنين من أفراد المباحث
بص الضابط علينا كلنا وقال بهدوء
مين الأستاذ كريم
كريم رفع إيده وهو بيحاول يبان ثابت
أنا
قال الضابط
محتاجين نتكلم معاك شوية
حماتي دخلت في الكلام بسرعة
هو في إيه يا حضرة الضابط
رد بهدوء
وصلتنا معلومات جديدة خلتنا نعيد فحص ملف وفاة المرحوم سامح
ولقينا أدلة ماكنتش موجودة وقت التحقيق الأول
قلبي دق بقوة
بصيت للظرف اللي في إيدي
وفهمت إن الرسالة دي مش صدفة
الضابط لمح الظرف وقال
إيه اللي معاكي ده
قلت
دي رسالة المرحوم سامح كاتب اسمي عليها وفيها فلاشة
أول ما كريم سمع كلمة فلاشة اندفع ناحيتي يحاول يخطفها
لكن فرد المباحث مسكه من دراعه بسرعة
وقال بحدة
مكانك
كريم حاول يفلت وهو بيزعق
دي أكاذيب… دي بتلفق لي
الضابط أخد الظرف من إيدي بحرص
وطلع الفلاشة
طلب من أحد الأمناء يشغلها على اللابتوب اللي كان معاه
سادت لحظة صمت تقيلة
وبعدين اشتغل أول فيديو
ظهر سامح بنفسه قدام الكاميرا
وشه كان مرهق لكنه كان بيتكلم بثبات
قال
أنا سامح… ولو الفيديو ده بيتشاف يبقى غالبًا حصل لي حاجة
أنا مش مريض زي ما الناس فاكرة
ولو مت فجأة يبقى لازم تعرفوا إن في ناس كانت مستفيدة من موتي
الكاميرا بعدها اتحولت لتسجيل من الصالة
وكان واضح التاريخ والوقت
ظهر كريم داخل الشقة
وبعده بدقايق ظهرت نجلاء
وبعدين…
دخلت حماتي
التلاتة كانوا قاعدين بيتكلموا
وفجأة سمعنا صوت حماتي بوضوح وهي بتقول
لازم سامح يبعد من طريقنا وإلا عمر كريم ما هيعرف يعيش حياته مع نجلاء
