سلفتي طلبت من جوزي حكايات بسمه
رانيا بصتلي على طول، كأنها كانت مستنية اللحظة دي.
وقالت:
— ما هو ندى معاها فلوس، وإنتوا ممكن تدفعوا القسط المرة دي، ولما ظروفنا تتحسن نبقى نرجعهولكم.
بصيتلها بهدوء وقلت:
— فلوس ندى دي محوشاها لأقساط شقتها والتزامات بيتها يا رانيا، مش مبلغ زيادة نقدر نتصرف فيه وقت ما حد يحتاج.
ملامحها اتغيرت، وردت بحدة:
— هو أنا قلتلك هاتي فلوسك صدقة؟ بقولك سلف، يعني هترجع!
قلت:
— وأنا مش بقول إنك مش هترجعيها، لكن أنا عندي التزامات، ومش هقدر أشيل التزام جديد.
هنا حماتي دخلت في الكلام:
— يا بنتي، ده أخو جوزك، يعني زي أخوه بالظبط! هو إنتوا هتسيبوا بعض وقت الشدة؟
كنت هرد عليها، لكن رانيا سبقتني وقالت بصوت عالي:
— هو إنتِ بتقوميه علينا ده أخو جوزي قبل ما يكون جوزك! إنتِ ناسية إن كريم طول عمره واقف جنب أخوه؟
بصيت لكريم، مستنية منه يقول إن المساعدة مش إجبار، وإن فلوس بيتنا مش متاحة لأي حد من غير اتفاق بينا.
لكنه اكتفى إنه يبصلي، وكأنه بيقولي بعينيه: «عدّي الموضوع المرة دي، وطلعي الفلوس وخلاص».
في اللحظة دي، حسيت إني مش قاعدة وسط عيلة جوزي، أنا قاعدة في محكمة، وكل الموجودين مستنيين الحكم عليّا عشان رفضت أدفع فلوسي.
قلت لكريم:
— إنت فعلًا شايف إن المفروض أدفع أقساط شقة أخوك من فلوس شقتي؟
اتنهد وقال:
— يا ندى، هو أخويا، ومش هسيبه يتبهدل. إحنا مش هنموت لو دفعنا القسط ده.
ابتسمت ابتسامة صغيرة وقلت:
— عندك حق، إحنا مش هنموت لو دفعنا قسط واحد… بس المشكلة إن محدش قال إن ده آخر قسط هندفعه!
لمحة نيوز
رانيا اتوترت، لكنها حاولت تخبي ده وقالت:
— يعني إيه الكلام ده؟
بصيتلها وقلت:
— يعني أنا مش هتكلم عن إحساسي، ولا هجادل في مين وقف جنب مين. أنا هتكلم بالأرقام.
فتحت شنطتي، وطلعت ملف صغير كنت محتفظة فيه بأوراق الشقة، وحطيته على الترابيزة.
كريم بصلي باستغراب:
— إيه الملف ده؟
قلت:
— ده كشف بكل الفلوس اللي خرجت من بيتنا لمساعدة حسام ورانيا خلال آخر سنة.
حماتي ضحكت بسخرية:
— هو إحنا وصلنا لمرحلة إنك هتحاسبي العيلة على كل جنيه؟
رديت بهدوء:
— لأ يا طنط، أنا مش بحاسب حد على مساعدة عملتها برضاي. أنا بس عايزة أوضح إن اللي بيتقال عليه «مساعدة بسيطة» بقى مبلغ كبير، وإن كل مرة بنقول دي آخر مرة، بيظهر طلب جديد.
