الضره المجهوله ج١ منى السيد
متستنينيش عشان هتأخر.
قفلت التليفون وحطيته في الشنطة.
الساعة ستة ونص، والناس بتبدأ تلم حاجتها عشان تمشي، شوفت نسمة بتظبط الروج والميك اب بتاعها قدام المراية.
أحمد جاي يلقطني من قدام الشركة. رايحين نتفرج على قاعة في فندق ع النيل عشان الفرح.
استنيت ربع ساعة لحد ما نزلت، ووقفت مستخبية ورا عمود رخام في مدخل البرج تحت.
الساعة سبعة وتسع دقايق، بانت العربية التوسان الرمادي بتاعة جوزي.
أحمد نزل منها بهيبته.
نسمة طلعتله بتجري وعلى وشها ضحكة من الودن للودن.
باسها من بؤها قدام عيني.
وبعدين فتحلها باب العربية وركبت معاه.
طلعت تليفوني، وخدت تلات صور ورا بعض زي الطلقة.
روّحت البيت، وهو جه على الساعة حداشر وشوية.
إيه الأخبار، عميل المنصورة عمل معاك إيه؟ سألته ببرود وأنا واقفة في المطبخ بغسل مج الشاي.
قلع بليزر البدلة ورماه ع الكنبة بتعب مصطنع
كان يوم مهبب. العميل دماغه ناشفة وعايز يعيد هيكلة كل حاجة ومش فاهم أ ب بيزنس.
يا ساتر.. ربنا يعينك.
يلا، أكل عيش بقى.
كان بيكدب وهو باصص في عيني ومطرفش رمشه حتى.
معملتش أي مشهد، ولا اتكلمت.
تاني يوم الصبح اتصلت ب نهى، بنت خالتي، مراجعة حسابات شاطرة جداً وشغالة في مكتب تدقيق مالي كبير. مخلتهاش تخترق حاجة ولا طلبت منها قلة ضمير.
سألتها بكل هدوء عن حقي القانوني أعمل إيه
ابدأي بالحاجة اللي ليكي فيها صفة رسمية ومكتوبة باسمك نصحتني كشوفات الحسابات البنكية المشتركة، عقود الاستثمار، الشيكات، التسهيلات الائتمانية. اسحبي كشوفات رسمية وطباعة من ال Online Banking، واوعي تفتحي بؤك معاه أو تلمحيله.
في نفس الليلة، وأول ما أحمد دخل ياخد شاور، فتحت اللاب توب بتاعه ودخلت على حساب البنك اللي عاملينه سوا للمصاريف والاستثمار.
لقيت تحويلات InstaPay وتحويلات بنكية مقفولة رايحة لشركة اسمها فيرتكس للاستشارات وإدارة الأصول.
تحويل ب 180 ألف جنيه.
وتحويل تاني ب 240 ألف.
وتحويل ب 95 ألف.
عمري في حياتي ما سمعت اسم الشركة دي في البيت.
بس اللي شل تفكيري كان حاجة تانية خالص.
من شهرين بالظبط، اتسحب 850 ألف جنيه كاش من حساب شهادات الاستثمار المشتركة بتاعتنا.
والخانة مكتوب فيها ملاحظة التحويل
مساهمة مبدئية
