الخيط الرفيع منال على

كنا مع بعض بقالنا 8 شهور.. مدة غريبة، كفاية إنك تعرف هتاكل إيه وتشرب إيه، بس مش كفاية إنك تعرف أصل اللي قدامك. كفاية إن القناع يقع.. وصاحبه مش واخد باله.
كريم شغال في “التسويق” في توكيل عربيات فخمة. أنيق بزيادة، “بتاع منظرة” وبيهمه الناس تقول إيه. من النوع اللي يبص على نفسه في أي إزاز محل، ويظبط الياقة قبل ما يدخل أي حتة. كان دايماً يقولي بلهجة فيها تعالي: “إنتي عندك موهبة مدفونة..” كأنه بيتكلم عن شقة “على المحارة” ومحتاجة مصاريف.
قريت الرسالة تاني.. “لابسة لبس البيت ونازلة.”
الكلام مكنش لايق عليا خالص.
جت رسالة تانية:
“لو مش هتعرفي تلبسي حاجة تشرف، بلاش تيجي حفلة الشركة أحسن.”
نقطة عرقت نزلت على قفايا.. مش من الحر، من القهرة. بقلم منــال عـلـي
مش عارفة إيه اللي وجعني أكتر: إنه كسر بخاطري، ولا إنه بيقولها ببساطة وبرود كأنه بيطلب شاي!
كتبتله: “تمام.. هتصرف.”
رد بـ “إيموجي” 👍 وبس.
الحاجة اللي كريم ميعرفهاش -ومحدش في “شلته” يعرفها- إني أنا “البراند” بتاعي. أنا مش “هاوية”، أنا بنيت “أتيليه جنى” من الصفر عفرتة. شغلي بيظهر في عروض أزياء، وكليبات، وعلى أغلفة مجلات.. بس من غير
ما اسمي يتصدر المشهد. مش كبر، بس بحب “الصنعة” هي اللي تتكلم.
بس لما تعيش وسط القماش والمقص، بتتعلم تلبس اللي يريحك ويستحمل المرمطة. كنت بلبس الجينز “المبهوق”، وتيشرتات عليها بقع، وأربط شعري بأي حاجة قدامي.
ده كان “يونيفورم” الإبداع.. مش إهمال.
بس كلامه فضل يرن في وداني: “لبس البيت.”
حاجة تسخر.. إيدي اللي وصفها كدة، عملت فساتين تمنها أغلى من “البونص” بتاعه. اشتغلت وأنا مهددة بالطرد من المكان، وصوابعي اتجرحت عشان أطلع جمال للناس.
بس هو مشافش غير البقع.. وافتكر إنها دي الحكاية كلها.
بصيت على توب قماش حرير كحلي “زُهري” على الطربيزة.
كنت شايلاه لليوم الكبير.. غالي ومستخسراه.
يمكن.. جه وقته.
بعد يومين، عزمني على العشا.
قالي: “البسي حاجة سيمي فورمال” – يقصد: “خليكي نسخة مني ومن المنظرة بتاعتي.”
في المطعم، قدمني لزمايله. واحدة اسمها “سارة” بصتلي بصه فاحصة من فوق لتحت.
قالت: “إنتي من النوع اللي بيحب الهاند ميد والشغل اليدوي ده، صح؟”
كريم ضحك بـ “سميجة”: “أيوة.. بتفصّل شوية أزياء كدة.”
صلحتله بكل ثقة: “أنا مصممة أزياء.”
قالت بتريقة: “بتاعة مسرح يعني؟”
دخل هو بسرعة: “بتحاول تفتح مشروع صغير.
”
“بتحاول..”
ابتسمت، رغم إن دمي كان بيغلي.
لمحة نيوز