يوم فرحي حكايات رولا

​وده اللي حصل.
​صندوق الاستثمار كان عامل اجتماع كبير في فندق في التجمع الخامس، بحضور المحاميين، المراجعين، ممثلين البنوك، وشوية صحفيين من الصحافة الاقتصادية.
​”مجموعة الشاذلي” كانت لسه شريكة مع عيلة كريم في مشروعين صغيرين، عشان كده أنا حضرت بصفتي ممثلة للشركة بتاعتنا.
​قبل الاجتماع بـ 3 أيام، كريم ظهر في مكتبي.
​المرة دي مكنش جايب ورد.. كان جايب إقرار عاوزني أمضي عليه.
​قريته.
​كان مكتوب فيه إن انفصالنا كان لأسباب شخصية بحتة ومفيش أي نزاعات تجارية أو مالية بين العيلتين.
​— الكلام ده مش صح.
​— نقدر نسوي كل المشاكل دي بيننا قبل ما نفل الفلوس.
​— خلاص، سوّيها الأول وبعدين أكون أمضيلك.
​— يا فريدة، لو صندوق الاستثمار وقف التمويل، أوبا هيضطر يبيع أصول من الشركة!
​— كان المفروض تفكر في ده قبل ما تعمل اللي عملته.
​قرب من مكتبي وقال:
​— قوليلي انتِ عاوزة إيه بالظبط؟
​الجملة دي أكدتلي إنه لسه فاكر إن كل حاجة في الدنيا ليها سعر وممكن تشتريها.
​— عاوزاك تحدّث تنازل الـ 20% بتوع أبراج التجمع رسمياً، وعاوزة مجلس الإدارة يتقدم له تقرير كامل عن الـ 780 ألف جنيه، وعاوزة الـ 20% بتوعك في الجاليري يتجمدوا لحد ما لجنة المراجعة تخلص.
​قام وقف بغضب:
​— أنتِ بتستغلي الظروف وبتنتقمي!
​— أنا بحمي حقي وبمنعك تلعب بالفلوس اللي أنت خلطتها ببعضها.
​— ريناد حامل! والبيزنس ده عشانها وعشان ابني!
​— ابنك يستاهل نفقة محترمة من أبوه، مش حسابات مزورة وورق مش مظبوط.
​ممضاش حاجة ومشي.
​تاني يوم طاهرة هانم اتصلت بيا:
​— كريم هيروح في داهية يا فريدة.
​— أنا كمان كنت هروح في داهية لما كنت واقفة بفستان الفرح مستنياه يرجع من المطار.
​— أنا مش بطلب منك تسامحيه..
​— يبقى متطلبش مني أمضي على ورق مزور.
​سكتت.
​— أنتِ هتهدي شركة المقاولات عشان اللي كريم عمله؟
​— لا يا طاهرة هانم.. لو الشركة جرالها حاجة، هيبقى بسبب اللي متسجل في دفاترها هي مش بسببي أنا.
​في نفس اليوم بالليل، مجلس إدارة شركة عيلة كريم أمر ببدء مراجعة الداخلية وسحب صلاحيات التوقيع المالي من كريم مؤقتاً.
​يوم الجمعة وصلت الفندق مع الأستاذ طارق وممثلة مكتب المحاسبة.
​كريم اتكلم لمدة 40 دقيقة كاملة.