استغنى عنه ج١ منال علي
الجزء الأول:
ريم عمرها ما كانت من الستات اللي بتزن أو تطلب حاجات غالية. طول عمرها تقول: “الستر أهم… والبيت أولى.” ولو نفسها في حاجة، كانت بتأجلها لحد ما تنساها.
لكن في اليوم ده، وهي ماشية مع جوزها أحمد في مول كبير بمدينة نصر، حصل حاجة بسيطة… قلبت جواها سنين كاملة.
وقفوا قدام محل هدوم شيك، وعين ريم وقعت على فستان أخضر زمردي، تصميمه بسيط، لكنه أنيق بطريقة خطفت قلبها.
وقفت قدامه شوية، وبعدين دخلت المحل.
البياعة ابتسمت وقالت: ـ اتفضلي يا فندم، جربيه… هيبقى تحفة عليكي.
دخلت الأوضة وغيرت هدومها، ولما خرجت، بصت لنفسها في المراية.
من سنين وهي مشافتش الست دي.
وشها كان منور، ولون الفستان مبرز ملامحها، وحست للحظة إنها رجعت ريم اللي أحمد حبها زمان.
ابتسمت من قلبها، ولفت ناحيته وقالت بدلع خفيف: ـ إيه يا أحمد… حلو؟
أحمد كان ماسك الموبايل بيحسب مصاريف الشهر، رفع عينه بسرعة، وبص للفستان ثانيتين.
وقبل ما ريم حتى تكمل ابتسامتها، قال بصوت عالي، والعصبية مالية نبرته:
ـ لا… مش هشتريه. استغني عنه بقى!
الكلمة خرجت كأنها صفعة.
المحل كله سكت.
البنت اللي على الكاشير بصت في الأرض من الإحراج، وست كانت بتقلب في الهدوم بطلت حركة وبصتلهم، وحتى طفل صغير كان بيجري وقف يتفرج.
ريم حسّت إن الأرض اتشقت تحت رجليها.
ابتسامتها اختفت.
وشها احمر، وإيديها بدأت تترعش وهي بتفك الفستان وترجعه على الشماعة.
قالت بصوت مكسور: ـ خلاص… ولا يهمك… يلا نمشي.
أحمد خرج من غير ما يبص وراه، وهي خرجت ماشية وراه وهي حاسة إنها صغيرة قوي.
…
طول الطريق للعربية، ولا كلمة اتقالت.
أحمد كان سايق وعينيه على الطريق، أما ريم فكانت باصة من الشباك.
المطر الخفيف كان بينزل على الإزاز، وهي بتحاول تمنع دموعها.
هي أصلًا كانت عارفة ظروفهم.
أحمد شغال ميكانيكي في مركز صيانة، والمرتب بالعافية بيكفي.
الشقة لسه عليها أقساط.
وابنهم كريم داخل تانية إعدادي، والدروس بقت نار.
ولسه الأسبوع اللي فات دفعوا مبلغ كبير في تصليح الغسالة.
هي ما كانتش زعلانة إنه رفض يشتري الفستان…
كانت موجوعة من الطريقة.
كلمة “استغني عنه” فضلت ترن في ودانها.
افتكرت أحمد زمان…
لما كان طالب في الجامعة، يفضل أسبوع كامل يجمع من مصروفه عشان يجيب لها وردة، ويضحك وهو يقول: ـ أهم حاجة أشوفك مبسوطة.
