بيت اهلي ج٣ صافي هاني
باسم رجع لورا خطوة وهو بيهمس
لا… مش دلوقتي
الرجالة دخلوا بهدوء من باب المبنى
ماكانوش بيزعقوا
ولا عاملين دوشة
لكن طريقتهم كانت كفاية تخلي أي حد يحس إن في حاجة كبيرة
واحد منهم قال وهو بيدور بعينه
الأستاذ باسم موجود
الظابط وقف قدامه وقال
حضرتك مين
الراجل طلع بطاقة تعريف من جيبه وقال
إحنا جايين عشان بينا وبين الأستاذ باسم معاملات مالية ولازم يقابلنا
أبويا قرب مني وقال بصوت واطي
خليكي ورايا
باسم حاول يبتسم وقال
مش وقته الكلام ده
نتقابل بعدين
لكن الراجل رد
بقالنا تلات شهور بنسمع كلمة بعدين
كل مرة وعد جديد
وكل مرة كدب جديد
أنا كنت واقفة ساكتة
وفجأة الراجل بصلي
وقال
حضرتك المدام
هزيت راسي
قال بحزن
أنا آسف إنك تعرفي بالطريقة دي
بس لازم تعرفي الحقيقة
باسم كان كل ما يستلف مبلغ كان يقول إن مراته دكتورة أبوها مليونير وإن أي وقت يقدر يبيع عربية مراته أو ياخد فلوس من أهلها
حسيت الدنيا اسودت قدامي
لفيت أبص لباسم
لقيته منزل راسه
يعني الكلام صح
الراجل كمل
إحنا اديناله فرص كتير
ولما فشل في السداد عرض علينا العربية
وقال إنها هتبقى باسمنا خلال أيام
أبويا بصله وقال
العربية دي باسم بنتي
ومحدش يملك يتصرف فيها غيرها
الراجل هز راسه وقال
دلوقتي فهمت ليه كان كل مرة يأجل
هو أصلًا ماكانش يملكها
ساعتها باسم انفجر
كفاية
كلكم واقفين تحاكموني
أنا غلطت
بس كنت عايز أنقذ نفسي
قلتله وأنا ببص في عينه
وليه ماطلبتش مني الحقيقة
ليه كل مرة كنت تختار الكدب
ليه خلتني أشك في نفسي
ليه كنت كل ما أواجهك بحاجة تقولي إني بتخيل
دموعه نزلت لأول مرة
وقال
لأنك لو عرفتي الحقيقة كنتي هتسيبيني
قلت بهدوء
وأهو عرفت الحقيقة
ثم فتحت شنطتي
طلعت الملف اللي كنت مخبياه من سنتين
وحطيته في إيد أبويا
وقلت
أنا كنت بجمع الأدلة عشان أقنع نفسي إني مش مجنونة
لكن النهارده مش محتاجة أي دليل
