ايو انا حبيتها فاطيما يوسف

وكلهم استغربوا من اللي هو بيعمله وقال ابو زهره :

_انت بتشم ايه يا ابني الفنجان نظيف ومغسول متقلقش .

رد عليه كريم بسرعه وقال له :

_لا ما تفهمش غلط يا عم سيد انا بشم ريحه القهوه اللي انت وصفتها لي إني هدمنها وشكلي كده فعلا .

وعدي اليوم بسلام وكريم من ساعه ما شافها وهو قلبه اتعلق بيها ،

ومستريحش غير لما جاب رقمها وبعت لها رساله يسأل عنها بأي حجة وبقي كل يوم عن اليوم إللي قبله يطور معاها في الكلام لحد مبقاش يستغني عنها ،

وعدي كذا شهر وهما علي ده الحال بيكلمها من بعيد لبعيد لكن خلاص جاب آخره ففكر يعمل حفله ويفاجئها في الحفله بطلبه ،

وراح عندهم البيت في يوم وبعد التحيه والسلام

كمل كلامه وهو بيعرض عليهم وقال :

_ان شاء الله انا هعمل حفله بسيطه عندنا في الفيلا ماما مصممه تعملها علشان تحتفل برجوعي من السفر،

أينعم هي اتأخرت شويه بس كان فيه ترتيبات كتييره لازم أخلصها وان شاء الله أنتم اول المعزومين يا عم سيد .

ابتسم عم سيد وقال له بخجل :

_معلش يا ابني اعفينا احنا من الحفله دي انت عارف الحفله دي كلها ناس كبارات واحنا يعني زي ما انت ما شايف على قد حالنا فاعذرنا احنا .

رد عليه كريم وقال له بتصميم:
_كلام ايه اللي انت بتقوله ده يا عم سيد ده انتم اول المعزومين وتشريفي بوجودكم على راسي من فوق أصلا مش هحس بطعم الحفله اللي انا مجبر عليها الا بوجودكم جنبي .

فرح جدا عم سيد من كلامه وقال له :

_خلاص يا ابني والله انا مزعلك بس ما فيش داعي اني زهره ووالدتها يجوا انا هاجي وهقف جنبك .

اول ما كريم حس اني زهره ممكن ما تجيش اتضايق جدا وقال لعم سيد بتصميم اكثر:

_دي خالتي ام زهره وزهره قبل منك وكمان ماما ما شافتهمش من بقالها كتير فهاتهم يستمتعوا معانا بالحفله وهنكون مبسوطين اكثر وكمان يغيروا جو .

وفضل وراه لحد ما اقنعه وقال لهم وهو بيستاذن علشان يمشي بعد ما قعد كثير بس اضطر ان هو يمشي :

_انا طبعا ما اقدرش انسى هداياكم اللي انا بجيبها معايا كل مره بس حبيت اجيبها من هنا لأن الحاجات هناك متناسبش لبس المحجبات لو سمحت يا عم سيد تقبلها وما ترجعهاش زي كل مره علشان ما ازعلش وأنا زعلي وحش .

وافق عم سيد علشان ما يزعلهوش وعدى اليوم بسلام من ساعه ما مشي وزهره ما بطلتش تفكير فيه ولا هو كمان،