قناع الامومه ج2 منال علي
مرت الشهور.. والشهور دي كانت بمثابة عمر جديد لينا.
حياتنا والبيت بتاعنا اتغيروا تماماً بنسبة 180 درجة.
البيت مبقاش فيه ريحة الخوف والتوتر اللي كانت بتخنقنا أول ما نعتب الباب. ريحة الزجر والتعالي اختفت. وبقى البيت مليان روايح تانية تفتح النفس.. ريحة قهوة الصبح اللي بنشربها مع بعض وأنا بجهز عشان أنزل شغلي، ريحة بودرة الأطفال وتالكو يحيى وهو بيلعب على السجادة وبيضحك ضحكة صافية من قلبه، ريحة شوربة العصفور الدافية اللي مريم بتعملها بحب ومزاج رايق لما تحب تدلعنا، مش وهي واقفة مرعوبة تحت تهديد الأوامر والنظرات القاسية.
يحيى بدأ ينام بانتظام، وبقيت أشوف الضحكة واللمعة في عيون مريم من تاني. الوش الباهت الخاطف رجع له نضارته وشبابه. وأنا نفسي اتعلمت درس عمري: اتعلمت إني أرجع بيتي بدري، اتعلمت إن الشغل والفلوس مش هما كل حاجة لو خسرت أمان مراتي وولدي، واتعلمت إني أسمع مراتي بقلبي وعقلي، ومخلطش أبداً بين “بر الوالدين” وبين السماح بخراب البيوت وظلم شريكة حياتي.
أمي حاولت تتصل بيا كتير جداً.بقلم منــال عــلي
كانت بتبعت رسايل طويلة على الواتساب، وتبعت خطابات مع قرايبنا، وتسيب ريكوردات بصوت باكي متهدج وهي بتدعي بالمرض والتعب. بس الغريب في كل الرسايل دي والدموع دي، إنها عمرها ما قالت كلمة “آسفة” أو “سامحوني”. كانت دايماً بتدور حولين نفس النغمة: “أنا اللي ربيتك وتعبت فيك.. أنت عاق.. أنت مدين ليا بعمرك كله.”بقلم منــال عــلي
في يوم من الأيام، وصلني ظرف مقفول ملوش اسم راوتر ولا عنوان مرسل. أول ما شوفت خط الإيد الرفيع المايل عرفت إنه منها.
وقفت قدام باسكت الزبالة في الصالة، ماسك الظرف في إيدي لكام ثانية.
الناس ممكن تفتكر إني كنت حاسس بغل أو رغبة في الانتقام، أو حتى بتأنيب ضمير وعقوق.
بس الحقيقة.. مكنتش حاسس بأي حاجة من دي.
كنت حاسس بحالة سلام داخلي ونقاء ملوش مثيل. حالة هدوء بتيجي لما تقفل باب عاصفة كانت هتهد حياتك كلها.
قطعت الجواب نصين.. وبعدين أربعة.. ورميته في الباسكت من غير ما أفتحه ولا أقرأ سطر واحد فيه.
في الليلة دي، وأنا بمر على أوضة يحيى وببص عليه وهو نايم في أمان، وبعدين دخلت أوضتنا ولقيت مريم نايمة في سلام، ويحيى الصغير نايم على صدرها بحنان ودفا، اتعلمت أصعب وأقوى درس في حياتي كلها:
