زوجتي ولكن ج1 دفنا عمر

الفصل الاول ------------ أنتهت لتوها من هندمة هيئتها استعداد لمجيء ابن العم" ناصر" وخطيبها الذي عقد قرانه عليها منذ شهران وبضعة أيام ، متذكرة كيف نجح بإقناع أبيها بتلك الخطوة رغم عدم جاهزيته لإتمام زواجهما ماديًا، محاولا أدخار كل يتحصل عليه لتوفير مسكن بسيط يضمهما سويًا..أما هي فتعمل بأحدى المصانع القريبة التي تُحيك العباءت السوداء.. لتشارك والديها بمستلزماتها گعروس مرتقبة! _ أبلة جنة.. أمي بتقولك أعملي شاي لابويا وخطيبك عشان جه برة! رفرف قلبها بين جنباتها لذكره واستدارت عن المرآة تحدث شقيقتها نجلاء ذات الثمان أعوام: _ماشي يانوجا.. هعمل الشاي واحصلكم! تنهدت بشوق: عقبال ما اعملك الشاي واحنا في بيتنا يا نصري! _______________________ يجاور ناصر العم " رحيم" وهو يسحب نفسًا عميق كي يملأ رئتيه بدخان الأرجيلة، ثم يزفره لتتراقص سُحب الدخان المتصاعد. يصاحبه صوت فقاعات الماء بتلك القنينة الزجاجية مخدوشة الألوان أسفله متسائل: لقيت شقة ولا لسه يا ناصر؟ أردف الأخير: ماهو ده اللي جابني انهاردة يا عمي، واحد صاحبي في الورشة ابن حلال، لقى شقة مطرحين وصالة تناسب ظروفي.. هي صحيح على السطوح في الدور السابع، بس مش مُشكِل يعني احنا لسه شباب.. بس عيبها عايزة مصاريف ياما لتوضيبها وتظبيطها من سباكة لنجارة لكهربة ونقاشة.. وبعدها نشوف حتتين عفش على قدنا ونتسهل على الجواز على طول! العم رحيم بتفهم: كله هيتقضي يا ابني ما تقلقش ربك بيسهل وبيرزق اللي ماشي في الحلال.. وانا عن نفسي داخل كام جمعية عشان اجهز البت جهاز يليق بيها.. بعون الله على اخر السنة تكونوا في بيتكم! _إن شاء الله، انا بشتغل في الورشة بأيدي وسناني.. عايز اتكن في بيتي انا وجنة بقى! قهقة رحيم: مستعجل على الهم بدري ليه.. هتتجوز هتتجوز..! أطلت على مجلسهما بمحياها الباسم وقامتها الفارعة والشوق يُكحل مقلتاها البنية متمتمة برقة أذابته: _ سلاموا عليكم..! أغرقتها نظرته المتلهفة بوضوح أخجلها: وعليكم السلام ياست البنات! عاملة إيه يا جنة؟ غمغمت بذات الرقة: الحمد لله ..أمي حضرت الغدا اتفضلوا..! ناصر بحرج: والله ماله لزوم.. مش كل اما اجي تكلفوا نفسكم كده.. انا جيت بس اقول على خبر الشقة وامشي! هتفت بلهفة لم تواريها: أنت لقيت شقة يا ناصر؟! تلقف لهفتها بنظرة حانية أعادت لها الخجل: أيوة يا جنة لقيت شقة مطرحين وصالة فوق السطوح تناسب القرشين اللي معايا.. بس لازمها توضيب كتير عشان نعرف نتجوز فيها أسرعت تهتفت بحماس : ماتشلش هم اللي تقدر تعمله اعمله انا راضية حتى لو بأوضة واحدة! ذغر لها " والدها" بنظرة محذرة، فحمحمت بحرج: قصدي يعني متكلفش نفسك فوق طاقتك.. وضبها كده ع الماشي واللي مايتعملش انهاردة يتعمل بكرة! " لا وانتي الصادقة.. اللي مايتعملش انهاردة.. مابيتعملش خالص يا عين امك" استدارت لوالدتها التي انضمت لمجلسهم لتوها، فتمتم ناصر: وأنا مش هتأخر يا مرات عمي.. هعمل كل اللي في جهدي وأكتر عشان اخلي الشقة تليق بجنة! برطمت بصوت خافت: أما نشوف! رحيم: يلا عشان ناكل لقمة ونحبس بشوية شاي.. اتفضل يا ابني! ( سبقه العم بخطوات وتبعته زوجته، فتباطأ هو ليظل بالخلف جوارها، ثم دنى منها هامسًا بأذنيها: وحشتيني يا جنتي! أحمرت وجنتاها: وانت أكتر يا ناصر! تشربت عيناه حُمرة وجهها بنهم: مبسوطة موضوع الشقة ده! هتفت بسعادة تلقائية: هطير من الفرحة يا ناصر.. اخير لقينا اربع حيطان يلمونا.. ربنا يرزقك برزقها وتخلص بسرعة! غمغم بخبث: مستعجلة على الوصال يابت! اشتعلت وجنتيها متداركة لهفتها الكاشفة لتنفي على الفور: لا بس يعني نفسي ابقى في بيتي وبراحتي معاك! _ هانت يا جنتي.. انا هنحت في الصخر لحد ما اختصر الوقت، لأني خلاص مبقيتش قادر على بعدك! ابتسمت برقة: ربنا يقويك ويعينك" تمتم: ويخليكي ليا ويقرب البعيد! ثم لثم وجنتها سريعا فهتفت بتحذير: جرى إيه يا ناصر حد يشوفنا عيب كده.. " _ طب ما يشوفنا احنا بنسرق؟ إنتي نسيتي اني عاقد عليكي ولا إيه.. _ لا بس بردو ماتتمداش..مش كل اما تشوفني ت... . _ كملي؟ تسائل بمكر، فاستطردت بمراوغة: وبعدين معاك بقى، بطل الخبيث ده! " الأكل هيبرد، هاتي خطيبك ياجنة وتعالوا" ارتبكت مرددة وهي تجذب كفه: طب يلا ابويا استعوئنا.. خليك تاكل لقمة وتشرب شاي وترجع ع الورشة عشان الاسطى مايقلبش عليك ويضايقك! عكر صفوه ذكر الأخير فتمتم: الله يحرقه.. بيوقفلى على الواحدة وقارفني في عيشتي.. ربنا يتوب علينا من ورشته، انا اصلا بدور على شغل مع حد تاني! هتفت لتُثنيه عن ما نوى: يا ناصر انت ضامن مكان تاني هيكون ازاي.. كل شغل فيه وفيه.. انت اشتغل بما يرضي الله وهو وقتها مالوش عندك حاجة واحمد ربنا غيرك مش لاقي! تنهد برضوخ: اديني شغال اما نشوف اخرتها..! _ اخرتها الخير كله يا اسطى! أردف بحنان مشاكس: عيون قلب الاسطى! وواصل: بس زعلان منك.. كلمتك بالليل ماردتيش! هتفت بضيق: لأن تليفوني باظ يا ناصر.. نجلاء اختي وقعته في المية امبارح.. زعلت عليه أوي ومش هعرف اجيب زيه دلوقت..! _ ولا يهمك يا حبيبتي.. هاتيه يمكن اعرف اصلحه، وان ما اتصلحش هجيبلك غيره! اعترضت: تجيب إيه يا ناصر.. التليفونات بقيت غالية اوي خليك في الأهم.. انا هستلف تليفون امشي بيه نفسي من البت سامية صحبتي، ماتشغلش بالك! _ طب هاتيه بس وربنا يسهل! _______________________ في منزل ناصر وصخب صوت التلفاز العالي يملأ الأجواء.. وفتاة صغيرة مندمجة بكل حواسها مع لقطات فيلم كوميدي قديم! (ازاي حسن هيكتب كتابه على عزيزة من غير ما يئرا فاتحتها؟! عبد الفتاح القصري: _أنا قلت يكتب كتاب الأتنين يعني يكتب كتاب الأتنين! _وأنا قلت يا جواز حميدة وبس يا مافيش جواز عبد الفتاح القصري: يا وليه اسمعي الكلام.. أنا راجل وعمر كلمتي ماتنزل الأرض أبدا.. _ حنفي. _ خلااااص ..تنزل المرادي.. بس اعملي حسابك المرة الجاية.. كلمتي مش هتنزل الأرض أبداااا..!) "وطي التليفزيون وقومي ذاكري يابت انتي" تجاهلت شهد صياح والدتها، وواصلت متابعة الفيلم الكوميدي " ابن حميدو"..فهدرت بها الأخيرة: _ بقولك قومي من قدام التليفزيون خلي يومك يعدي.. ياريتك فالحة في مذاكرتك زي الأفلام! وشوفي مين بيخبط بسرعة يمكن ابوكي ولا ناصر اخوكي.. انجري يابت ماتفرسنيش! نهضت شهد على مضض تبرطم: كل حاجة شهد شهد..ما سعيد موجود اهو مش بتنادي عليه ليه ولا عشان أخر العنقود يعني.. امتى اتجوز واسيب البيت ده، يابختك يا نوال، كبيرة وهتتجوزي وتسيبي البيت اللي يخنق ده! التقطت أذني " ناصر" أخر تمتمات شقيقته الغاضبة: هو انا سمعت كلمة جواز ولا بيتهيئلي؟ أجابته الصغيرة بضجر: أيوة بدعي اتجوز عشان ارتاح من طلبات امك! أمسك ياقة بيجامتها: أسمها أمك يا ام لسان؟ وبعدين عايزة تتجوزي وانتي لسة اتناشر سنة؟ أمال انا اعمل إيه؟ أروح انتحر؟؟؟ _ سيبني طه.. أنا مالي ماتتجوز ..هو انا اللي معطلة جوازك انت وأبلة جنة؟ .. أتجوز ياعم وريحنا! ناصر وهو يطالعها ببلاهة: عم؟؟؟ الله يخربيت اللماضة بتاعتك.. امشي يابت نادي امك عايزها في كلمتين! _ أوووف بقى.. حااااضر. صفق كفيه بذهول وهو بتابع هرولة تلك القزمة شقيقته بزوبعة غضبها الطفولي! ___________________ _ خير ياضنايا.. عايزني في إيه؟ _ كل خير يامه.. بصراحة ابنك مزنوق في قرشين، وعايزك تظبطيلي جمعية كبيرة واقبضها الأول! _ وماله يا قلب امك.. هكلم خالتك ام زكي تعمل حسابك في الجمعية. بتاعة أول السنة.. ما انت عارف، هي اللي بتفك. زنقة الحارة كلها..! بس مزنوق في إيه؟ _ عايز ادفع خلو الشقة قبل ما تطير مني.. ماصدقت لقيت حاجة سعرها مناسب! مصمصت شفتيها ساخرة: انا عارفة مدلوق ع الجواز كده ليه.. اتقل يا واد وامسك نفسك شوية! _ يامه عايز اتكن في بيتي واتجوز .. ولا انتي مش عايزة تفرحي بعيالي حواليكي! غلبها حنان أمومتها: وانا في ديك الساعة. اما اشيل عيالك ياضنايا.. خلاص ولا تشيل هم.. سيب حكاية الجمعية. دي على الله ثم عليا..! قبل رأسها بحماس بمتزج بامتنانه: أيوة كده يا ام ناصر.. فرحي قلبي، واهو بعد ما ادفع خلو الشقة، هوضبها واحده واحدة.. مرة سباكة.. مرة نجارة ولا كهربة ولا نقاشة وهتتقضي. وتبقى عال! هتفت تدعوا بإخلاص ومحبة: إلهي يرزقك ويطعمك ويحول التراب في أيدك دهب يا ناصر يا ابن نادرة! لثم كفها: ومايحرمنيش منك يا غالية.. حطيلي لقمة بقى احسن ابنك واقع وعلى فطار الصبحية! _ من عيني يا حبيبي! ثم صاحت مناديا: بت يا شهد..حطي الطبلية وتعالي خدي مني أكل لاخوكي أوام! ألتقطا صوت برطمتها المعتادة، فتمتم ناصر: البت دي سايقة العوج وعايزة تتشد شوية يامه! هتفت بتوعد: المعوجة نعدلها بفردة شبشب يا ضنايا. ______________________ عند الجارة! أم. جنة: العواف عليكي يا ام سالم، جبتلك البيض اللي وصتيني عليه أهو.. 30 بيضة طازة ويستاهلوا بقك.. بألف هنا..! الأخيرة: ياختي تسلمي وماتحرمش منك، وغلاوتك مابحبش اشتري بيض من برة، وابو سالم دايما يقولي انك أولى.. حسابك كام بقى؟ _ يووه.. مستعجلة ليه يا وليه.. هي الدنيا هتطير! _ وربنا ما هنكسر بيضة في طبق إلا اما تاخدي تمنهم على داير مليم..اه الحق مايزعلش ياختي! تنهدت الأخيرة: خلاص يا ام سالم اللي تشوفيه! بنفس سعرهم القديم! أنقدتها ثمن ما جلبت، ولاحظت ملامحها العابسة، فتسائلت: مالك يا ام جنة شايلة الهم ليه كده؟اقعدي وقوليلي مالك وفضفضي لاختك! باحت ما داخلها بأرياحية اعتادها مع الجارة: _ كلام في سرك يا ام سالم.. الدنيا ضيقة معانا أوي.. مش عارفين نلم جهاز البت.. الحاجة بقيت نار ياختي مافيش حاجة رخيصة!..هما فاكرين الناس بتسرق ولا بتسرق عشان الأسعار دي كلها..! وجدت شكوتها صداها عند الجارة التي هتفت: _ ومين سمعك يا ام جنة! يمين بالله لسه عاملة. خناقة انا وابو محمد بسبب طقم "صيني" وطقم " العشا" اللي جبتهم للبت عشان يتحطوا في النيش.. وهو على قولة لازمته إيه صيني وعشا..كان كفاية واحد منهم يقضي الغرض..! _ماهو النصيبة دلوقتي كل حاجة لازم. تيجي وإلا الناس تاكل وشنا..اما بقى علينا اقساط وجمعيات تقطم الوسط! أم سالم: هنعمل إيه بقى..التقسيط هو الحل.. احنا هنلاحق على أيه ولا إيه، ده كام بق مفتوح ومصاريف ياما..! _ على رأيك.. حسين ومازن ونجلاء لسه عايزين تقلهم فلوس.. وانا نفسي جنة تتجوز عشان. يخف الحمل علينا شوية! مصمصت شفتيها: بس بنتك فقرية يا ام جنة، ليه ما قبلتش بالعريس التاني، كان مقتدر عن ناصر ابن عمها اللي ماتزعليش مني حاله معدوم ع الأخر.. _ نصيبها بقى فقرية زي امها، انا كان نفسي تاخد التاني عشان تعيش مرتاحة، بس هي بتحبه، وابوها فرح وقال ابن اخويا أولى! تمتمت بزهو: عارفة بقى "سحر" اختي، بنتها اتخطبت لعريس يشرح القلب، جاهز من كله..ومن عيلة عريقة! ام جنة بانبهار: ماشاء الله! على كده هياخدها العراق؟ الجارة بدهشة: عراق إيه يا وليه اللي هياخد بنت اختي ليها؟! أم. جنة: يووه! مش بتقولي العريس من عيلة عريقة؟ ضحكت الجارة وقهقهت وهي تفرد كفها على صدرها: يخربيت شيطانك يا ام جنة.. عيلة عريقة يعني مأصلة ومعروفة في اسكندرية.. عندهم خير كتير ياما، شاف بنت اختي اتهبل.. وقال يادي يا بلاش! هتفت بحرج: يادي الإحراج فهمت الكلمة غلط.. بس بركة ربنا يتمم بخير للجميع ويستر الغلابة اللي زينا.. ثم نهضت مردفة: هقوم بقى احسن عندي اشغال كتير! تمتمت الجارة باستنكار: مش قبل ما نشربي الشاي.. ولا اقولك.. ثم صدح ندائها عاليًا ( بت يا نادية.. شُئي حتة بطيخ لخالتك ام جنة أوام ) _ يختي بطيخ إيه قوليلي قومي شوفي اللي وراكي.. في كام زبونة طالبة شوية بيض بلدي وفراخ حشو وبط..هروح اوديهم واخد اللي فيه النصيب! هتفت بتصميم: يمين بالله ماتمشي قبل ما تبلي ريقك معانا.. ثم كررت النداء ( إنتي يامقصوفة الرقبة ردي على أهلي بدال ما اقوملك.. صوتي اتنبح) _______________________ في الورشة! _ خد يا ناصر..لقطلك تليفون استعمال نضيف، بتاعة جوز اختي، لحظك لقيته بيعرضه للبيع، اخدته منه وفاصلت معاه في سعرها، وقالي مستعد يصبر عليك شهر على ماتدفع تمنها.. ها.. أيه رأيك؟ اجاب بفرحة: ده شهر عال اوي، بإذن الله فلوسه هتكون عنده قبلها لو قدرت! وتسلم يا رجب، مش عارف أودي جمايلك دي فين! _ عيب ياجدع احنا اخوات.. واستطرد: على فكرة لقيتلك صنايعي سباكة شاطر وبياخد مصنعية حنينة شوية! _ صحيح؟ طب هو فين خليني اشوفه واتفق معاه خليه يبدأ.. وانا اتفقت مع نجار الحارة اللي ورى، هيظبط باب متين مع الشبابيك وهيعملي حتتين عفش املى بيهم الشقة وهيحاسبني بالتقسيط! أهو على مايخلص اكون انا وضبت الدنيا رجب: على خيرة الله.. كده هيبقى فاضل النقاش، بس بعد ما تخلص السباكة والنجارة! _ قول يارب..وواصل: كلمت الحاجة تعمل حسابي في الجمعية الجاية؟ _ أيوة كلمتها وهتقبضك في معاد ما طلبت! ناصر: أيوة كده الله يسترها.. قرشين الجمعية دي هيكون تكاليف الفرح ومصاريف الليلة بتاعة اخوك! ربت رجب على كتفه: ربنا ينولك مرادك ويسترها معاك يا صاحبي! _ تعيش يامجدع.. عقبال ما اساعدك في جوازك انت كمان! _ إن شاء الله! ______________________ في مكان عمل جنة! _ إيه يا ناصر، طلبت اطلعلك برة ليه دلوقت.. ما انت عارف عندي شغل ولسه فاضل ساعتين وامشي! تمتم وعيناها تتجول على محياها: أولا وحشتيني، ثانيًا خدي شوفي جبتلك إيه؟! تناولت ما يقدمه مبتسمة وتملكها الفضول وعيناها تكاد تخترق المغلف وما ان فتحته حتى شهقت بإعجاب: يا حلاوة.. ده تليفون جديد يا نصر تمتم بزهو لاستطاعته نيل فرحتها: ده مستعمل، بس استعمال نضيف وغلاوتك، واديكي اهو افتكرتيه جديد.. اشتريته من جوز أخت رجب صاحبي! هنفت بفرحة: يخليك ليا يا ناصر.. وتعيش وتجيب يا رب! بس ده مش غالي؟ ماكانش له لازمة! غمغم وعيناه تهيم متجولة على محياها : انتي تستاهلي الدنيا يا جنتي.. الود ودي اجيبلك السما هدية.. وبعدين لو مش معاكي تليفون هكلمك ازاي.. انا لازم اسمع صوتك دايما .اطمن عليكي هتفت بدلال: مايحرمنيش منك ولا من ذوقك ابدا.. يلا بقى على شغلك كفاية دلع! _ ماشي يا ست البنات، وعلى فكرة ده كارت شحن كمان.. ثم اقترب وتمتم بمكر: عشان نتكلم سوا بالليل! أهو كلام يصبرني ويهدي شوقي! تلفتت حولها بخجل: طب سلام بقى وقفتنا دي مش حلوة.. ثم منحته نظرة عاشقة (وربنا يقرب البعيد! ) _______________________ في المساء! _ مالك يامه، وشك اصفر كده ليه؟ _ معرفش يابت دماغي تقيلة شكلي اخدت لفحة برد الصبح.. عضمي كله مكسر.. ناوليني حباية مسكنة! _ حاضر.. بس ده ناصر جاي بعد شوية! تمتمت: وماله هو غريب؟ وابوكي موجود.. هاتي بقى الحباية اخدها عشان افوق..! ناولتها كوب الماء لتبتلع "قرص مسكن"..وحضر ناصر بعد دقائق قليلة! _ إيه مالك يا حماتي؟ _ مافيش يابني حبة برد كده! رحيم: كويس انك جيت تشوف الماتش معايا يا ناصر.. ( اعملي براد شاي خلينا نشوف الماتش بمزاج ياجنة)..أطاعته: حاضر يابا..! .................. جوووووول..! هكذا صاح رحيم بحماس شديد: عليا النعمة ابو تريكة ده لاعيب ماجبتوش ولاده.. شوفت الحرفنة؟ ناصر: أمال إيه يا عمي، تريكة غني عن التعريف ورافع راسنا في كل حتة، ورجله تتلف في حرير ولا اجدعها لاعيب عالمي! _ صدقت والله ..وواصل: أنا واثق في الشوط التاني أكيد ربنا هيفرجها بهدف ولا اتنين تاني خلينا نهيص! تنحنح ناصر: معلش ياعمي انا بصراحة عايز اقعد مع جنة خطيبتي شوية هكلمها في حاجة مهمة وامشي عشان انام! رحيم ببساطة متعلقة بشاشة. تلفازه الصغير: مايجراش حاجة، اقعدو في الأنترية وانا قاعد هنا هكمل الماتش! ............... . أثناء مروره لينفرد بجنة بغرفة مجاورة ليجالسها قليلا، تمتم: الحقي امك.! نامت وهي قاعدة على الكنبة! هتفت بشفقة: مسكينة، شقيانا طول النهار وجت تعبانة، اخدت حباية مسكن.. تلاقيها خدرت وجعها وخليتها تنام ياعيني..! ناصر: لا ألف سلامة على حماتي! عبر الغرفة متسائلًا: _ أمال العيال اخواتك فين مش سامع حسهم يعني؟ _ بيلعبوا ع السطح فوق زي القرود من الصبح! تلفت خلفه بحذر ثم أوصد باب الغرفة فهتفت جنة بريبة: انت بتقفل الباب علينا ليه يا ناصر؟ أردف وهو يقترب وعيناه تنهل من تفاصيلها "بوله": أولا صوت التليفزيون عند ابوكي عالي اوي مش هعرف اكلمك براحتي.. وبعدين فيها إيه اما اقفل وانا بتكلم معاكي؟! نسيتي ان يحقلي انفرد بيكي؟ لازم كل شوية افكرك بكتب كتابنا..! تمتمت بتوتر وهي تتجنب لمساته التي تصهرها: أيوة بس............ بترت عبارتها وهو يجذبها لصدره مردفا ولمساته تزداد وتيرتها المتملكة وشوقه يتصاعد: بس إيه يا جنتي؟ خلوتنا دي شرعية.. امال انا كتبت كتابي ليه مش عشان اصبر نفسي شوية! ونثر بعض القبلات الخاطفة المتجولة على وجنتيها وعنقها فابتعدت تنهره بضعف: لو ما بطلتش هخرح واسيبك وربنا..! استجدى عاطفتها: واهون عليكي.. ده انا حبيبك! أزداد قربه وبدت مقاومتها تتراجع أمام رغبة تأججت داخلها لكنها تحاول الإفلات: يا ناصر كفاية بقى.. مايصحش كده! حد يشوفنا..! لكنه تمادى و يده تكتشف خرائطها وتتلمسها بشغف وقد خرج الأمر عن سيطرته مستغلًا مساحة الحرية التي منحه أياها والد الجنة الجالس بالجوار يصفق بصياح لإحراز هدف لفريقه.. بينما الأخر يحرز هدفًا تمنى الوصول إليه لاهثًا .. وهي تذوب بين ذراعيه غارقة بحرارة مشاعره الحميمية التي تلقتها برضا واستمتاع.. لتعبر في لحظات لعالم أخر تخطو أرضه للمرة الأولى..! ثم تآن وجعًا و ينتهي كل شيء..! متغافلين بذروة وصالهم! عن توابع لم تكن بالحسبان.. الفصل الثاني ------- جلست متربعة بقدميها أرضًا يحتوي حجر جلبابها البيتي صحن كبير بداخله حبات أرز أبيض.. تلتقط حصاه وكتله السوداء بشرود حزين.. وعقلها يُنقب عن مخرج لتلك الأزمة التي سقطت بها منذ تلك الليلة! لاعنة ضعفها وتهاونها لرغبة جامحة جرها إليها گ وسوسة شيطان..فأصبحت بين محاذير عقلها بعواقب إستسلامها بتوقيت خاطيء.. وبين ضعف غريزي أجج عشقها له گ أمواجه الثائرة لتشاركه الغرق وينزلاق من قاربهما الآمن ويقع بينهما المحظور! نعم هو بحكم الشرع والقانون زوجها.. ولكن بعُرف المجتمع وعاداته الصارمة والمورثات خاصتًا الشعبية منها.. لا يحق لهما ما فعلا.. عقد القران يندرج تحت ميثاق الخطبة وضوابطها لا أكثر.. والدها فقير الحال يلضم الجمعيات واحدة تلو الأخرى لدفع أقساط جهازها.. أما " ناصر" مازال يكنز الجنيهات لتجهيز شقة تناسب الحال.. غير طلبات ألزمه بها والدها ليؤمن لها زيجة جيدة! بينما تكافح الأم بطريقتها وترعى بعض الطيور القليلة التي تقوم بتثمينها لتبيعها فيما بعد كنوع من الأستثمار البسيط لجلب بعض الجنيهات الإضافية كإعانة لمعيشتهم الشاقة! _ بقالك ساعتين بتنقي حبة رز يا ست جنة.. أخلصي عشان تكنسي وتمسحي السلم وتطبخي قبل ما يجي ابوكي! نهضت بوهن لا تصطنعه.. والأثار الجسدية المتعبة لتلك الليلة تحل عليها، متمتمة: حاضر "يامه" قايمة اهو مستعجلة ليه.. هو في حد غيري هينضف ويمسح ويطبخ..! لوت الأم شفتيها بتهكم: مش عاجبك يا برنسيسة.. قومي يابت فزي بطلي لكاعة.. النهار قرب يعدي علينا.. وماتنسيش تحطي أكل للطيور.. وانا ساعة زمن هستقضى حاجات من السوق واجيب أكل للفراخ واجي! إياكي تستغلي غيابي وتنامي زي عوايدك الماسخة الأيام دي! راقبت رحيلها تاركة العنان لدموعها ولومها لذاتها يتفاقم ويزيدها قهرًا وصوت ضميرها يهذي: ( لو كنتي عروسة في بيتك دلوقت ياجنة.. مش كان زمانك بتدلعي وامك خايفة عليكي وفرحانة بيكي! مين حاسس بيكي دلوقت؟ لو جازفت وصارحتها باللي حصل هي ولا ابويا هيعملوا فيا إيه؟ طب هيصدقوا إن المحظور وقع بنا بعد كتب الكتاب؟ ولا هيظنوا إني سلمت نفسي قبلها وجبتلهم العار؟) تنهدت بحزن وعادت تندب حطها العاثر: آه يابنت " رحيم " على البلوة اللي وقعتي نفسك فيها..! كان هيجرى إيه لو كنتي صبرتي على حلالك وانتي بين حيطان بيتك معززة مكرمة! عديها على خير وكملها بالستر يارب! ____________________ نشوة تحتل خلاياه وتتغلغل في روحه بعد أن نال وصالها ونهل من رحيقها وأطفأ نار شوقه..لم يصيبه أي شعور بذنب على ما فعل.. جنة زوجته بشرع ربه.. وحبيبته بشرع القلب.. لن يجعل ما حدث أن يهديء عزمه في استعجال استقرارهما بمنزل الزوجية.. وربما يكون حافزًا أقوى ليتحرك بل يركض ليصل لنقطة التقاء دائمة لتصبح ملكة بيته وأنيسة أيام عمره القادمة! لكن يؤرقه ضيقها وقلقها وحزنها بعد ما حدث.. خاصتًا حين أصر أن يأخذها منذ يومان لترى شقتهما وتعاينها، ولأن الأجواء كانت خالية من عزول..أغراه انفراده بها بأن "يواقعها" مرة أخرى ليسترجع نشوته المُسكرة بتلك اللحظات الفائتة..ورغم تجاوبها معه بنفس الرغبة.. إلا انها صارت بعدها خائفة حزينة نادمة..يؤنبها ضميرها، فطمئنها ان ما حدث لا يُعد معصية هي زوجته شرعًا وقانونًا..لكنها أصرت أن تأخذ منه وعدًا ألا يعاشرها ثانيًا إلا يوم زفافهما.. فأزعن لرغبتها، ووعدها ألا يقترب منها إلا وهي عروس في بيته! ____________________________ بعد شهر! بدأت أول توابع ما حدث بينهما.. بنغزات أسفل البطن تتكرر بشكل أوجسها خيفة وأقلقها..مع تأخير روتينها الشهري گ فتاة.. لتتيقن فيما بعد أنها أصبحت تحمل نطفته بأحشائها..وهي كارثة حقيقية إن عَلم أبويها والجيران الذين لن يصدقوا أن ما حدث تم بعد عقد قرانهما.. بل ستُنسج الأقاويل والأفتراءت حول علاقة. مشينة منذ أيام الخطبة.. ليصير شرفها علكة يلوكها العالمين دون سلطان على ألسنتهم التي لن تنصفها أو ترحمها..! .................. " هنعمل إيه في المصيبة دي يا ناصر؟ عارف لو امي وابويا عرفوا هيحصل إيه؟ ولا أهل حتتنا اللي محدش هيصدق لو قلنا انه حصل في الحلال.. سُمعتي هتبقى في الوحل يا ناصر" لم يتحمل إنهيارها رغم صدمته وعدم توقعه ان. يحدث حمل وهو لم. يواقعها سوى مرتين بأوقات بعيدة تمامًا عن احتمالية حدوث حمل حسب ما علم منها حين سألها.. لكن قضاء الله أن يُرزقا بحملٍ غير مستعدين له على الأطلاق! _ قطع لسان اللي يجيب سيرتك بكلمة هتفت بنحيب: هتقطع لسان مين ولا مين يا ناصر! _ طب اهدي يا جنة خليني افكر هنعمل إيه؟ واصلت باكية: مافيش حل غير اننا نقدم معاد جوزنا ويكون بعد شهر بالكتير، وانت فاهم السبب، بس ازاي؟! ابويا وامي لسه ماجهزونيش وانت معملتش حاجة في الشقة ولسه عايزة شغل وفلوس ياما عشان تنفع للسكن..! وضع رأسه بين كفيه ببؤس، ملتزمًا الصمت الكئيب الذي هو يسمع بكائها.. ثم هتف بحذر: _ مافيش غير حل واحد قدامي.. لأن زي ما قولتي ولا انا جاهز للجواز دلوقت ولا انتم جاهزين! صمتت مترقبة اقتراحه فواصل: إنتي لسه في أول شهر.. يعني ممكن تنزلي العيل ونخلص على كده! جحظت عيناها برعب : يعني إيه يا ناصر؟! عايز تعمل فيا إيه؟ _ هشوف دكتور يسقطك بقرشين.. زي ما كله بيعمل! هزت رأسها برفض، والتصورات المرعبة تهاجم عقلها: مستحيل اعمل كده.. وترضاها عليا يا ناصر ابقي كأني بنت فلتانة من اياهم؟..والدكاترة دي بتكون مش محترمة وياما سمعت عنهم بلاوي.. لأ ..مش موافقة.. شوف حل تاني.. اتصرف ياناصر.. مش انت اللي استعجلت.. اتصرف وطلعني من المصيبة دي وإلا يمين بالله أموت نفسي وارتاح! هدرت أخر كلماتها بهستريا وجنون، فاحتواها ليهديء ثورتها وأحكم ذراعيه حولها: طب اهدي طيب متخافيش انا هكون معاكي مش هسيبك! ظلت تهز رأسها بعنف على صدره: قلت لأ ..مش هعمل كده.. اتصرف وشوفلي حل! فضمها أكثر : حاضر هشوف حل تاني بس اهدي عشان خاطري وبطلي عياط يا جنة ماتقطعيش قلبي.. خلاص أوعدك اشوف صرفة تاني! سكن جسدها وارتخت رأسها على كتفه، ولم يهدأ نحيبها وآنينها.. فصار يهدهدها إلى أن تلاشى كل بكائها، فجفف عبرات وجهها ولثم جبينها: تعالي اوصلك البيت ترتاحي وماتشليش هم حاجة..! هزت رأسها دون حديث، وصارت جواره يأكلها الندم واللوم لذاتها .. وخواطر سوداء تجوب عقلها لتزداد خوفًا ورعبًا وكل الأحداث المشابهة تمر بذهنها دفعة. واحدة! ( شوفتي ياجنة اللي حصل للبت سارة؟.. عريسها سابها فجأة قبل جوازهم بشهر.. بيقولوا انه اخد مراده وخلي بيها.. ونكر انه قربلها.. ومحدش مصدق البت ياعيني.. وبقيت فضيحة) ( كبدي عليها أميمة.. عريسها مات في حادث وهما كانوا هيتجوزو بعد 6 شهور.. بس النصيبة. الكبيرة انها كانت حامل منه في السر.. واخوها كان هيقتلها عشان استكردتهم.. لولا الناس حاشوه..) قصة تتداخل مع أخرى وحكايات مأساوية تهاجم خيالها.. لتنسج هواجس سوداء، فوقفت بغتة وأمسكت كفه بقوة مغمغمة برجاء: أوعى تسيبني ياناصر.. أوعي تتخلى عني وتنكر اللي بنا.. أوعى تبعيني ..أو تبعد عني لأي سبب.. أنت لازم تتصرف ونتجوز ) أدرك أن افكارها القاتمة تهاجمها والشيطان يشعل هواجسها ومخاوفها نحوه.. فأمسك كفيها ونظر لعمق عيناها يريل لها الوعود قبل ان يقسم لسانه: أقسم بالله ما هتخلى عنك ولا اسيبك إلا بموتي.. انتي مراتي وحبيبتي وحلم حياتي.. هعمل كل اللي اقدر عليه وهحل المشكلة بس انتي اهدي وخليكي واثقة فيا عشان خاطري.. حالك مقطع قلبي.. انا فعلا ندمان اني اتسرعت.. بس ماكنتش اعرف كل ده.. لكن بردو هحلها.. صحيح احنا مغلطناش غلط يحاسبنا عليه ربنا ولا خالفنا بيه قانون.. لكن كان لازم اراعي المجتمع اللي احنا جزء منه والعادات اللي ممكن تحاسبنا أكتر من كل قانون.. بس الوقت لسه معانا.. شهر بالكتير وهتكوني في بيتي يا جنة! _____________________ _مالك يا جنة.. سرحانة ليه وشايلة الهم؟ _ مافيش يا فؤدة.. صحيح هي البت سارة عاملة إيه؟ مصمصت شفتيها بشفقة: اللي جرالها كتير يا عيني، بطنها قدامها، وبعد ما اخوها ضربها والناس عرفت حملها و عمالة تتهمز وتتغمز عليها ونفسيتها بقيت في الأرض وانتي عارفة الواطي خطيبها اللي سابها نكر بس هي هددته انها هتعمل تحليل وترفع عليه ق\ضية.. فنخ وخاف ورجعلها..! واقتربت تحدثها بصوت خافت: بس كلام في سرك.. البت استنقصته ونزل من عينها.. قالت بس تولد ويكتب الواد بأسمه وتأمن نفسها وهتطلق منه وتربي ابنها لوحدها..! تجرعت ريقها وداخلها يُصلى بنار الهواجس السوداء: طب ليه، مادام رجعلها ما تكمل حياتها معاه! فؤادة: قالت كرهته ونزل من نظرها..! يلا بقى ربنا يعينها.. وواصلت: تعرفي ياجنة أنا من اللي شوفته ده مستحيل اكتب كتابي إلا قبل دُخلتي بيوم.. محدش عارف النصيب بيودي على فين ياختي، ولا بقى في راجل مضمون! والراجل الي يوفي بكلمته ده كنز والواحدة تمسك فيه بإيدها وسنانها..! صمتت شاخصة البصر وغاب صوت رفيقتها، وعقلها و يستعيد ما حدث مع ناصر ووعده ألا يتخلى عنها.. هل سيظل كذلك.. أم ستكون " سارة" أخرى.. ومآساة مماثلة! _____________________ - بت ياحنة رمضان خلاص قرب، فاضله يومين ويهل هلاله..عايزاكي تمسكي الشقة تنضفيها وتخليها قشطة وبتلمع.. اغسلي الحيطان وفرش الأرض، والستاير والهدوم.. واوعي تنسي عشة الطيور اللي فوق نضفيها وافرشي حبة نشارة جديدة .. والسلم عايز دعك بفرشة البلاط.. انا خلاص يابنتي مابقيتش قادرة ولا عندي جهد عشان اعمل معاكي. يدوب بخلص لفة كل يوم على الزباين وابيع اللي فيه النصيب من الطيور وبرجع هلكانة، بس انتي الله يحميكي لسه صغيرة وشباب..! وواصلت بحنان: خلاص يابت ده أخر رمضان هتكوني فيه وسطينا.. هتبقي ست وليكي بيت لوحدك.. بس ندر عليا أول جوازك وأول حمل.. هدلعك واخدمك برموش عنية.. وانا هبقى في ديك الساعة اما بنتي وأول فرحتي تكون أم وليها بيت وعيشة وراجل..! ربنا يسعدك يا قلب امك مع الواد ناصر.. المحروس حبيب القلب الفقري! بس خليه يشد حيله.. أخره سنة ويكون جاهز زي ما اتفق مع ابوكي! ارتخى جسدها بإعياء لتسقط فوق الأريكة العتيقة. خلفها بعد مغادرة والدتها..وكلماتها زادت من حزنها وندمها ..! لما انزلقت معه لبئر الرغبة، وتركته يسرق فرحتها وفرحة والديها حين تغدو في بيته عروس.. بكر رشيد.. تتنعم باهتمام والدتها كما قالت.. وبشغفه وهو يقترب للمرة الأولى.. تمارس دلال العروس المتعبة بأول زواجها.. تستقبل نصائح والدتها بخجل.. لكن كل هذا وأكثر ضاع منها.. أصبحت بكارثة.. وزواجهما أضحى أمرًا مطلوب إنجازه بأسرع وقت ممكن! من يشعر بها الآن وهي تعاني أعراض الحمل والغثيان وآلام البطن وكثرة النوم والهزلان.. وبدلًا من ان تنول راحة ودلال ورعاية.. هاهي مطالبة بإنجاز الكثير من شغل المنزل عاجزة حتى عن الشكوى او التذمر..! _________________________ أراد أن يسعدها بشيىء بسيط.. لأنهم على مشارف قدوم شهر كريم ..فابتاع لها فانوس رمضان الملون بحجم كبير ويعلم انه سيروقها وتدخره ليُعلق في منزلهما كما تفعل بكل شيء ذو قيمة..وتحتفظ بيه من ضمن أشيائها البسيطة بجهاز عُرسها..! كاد أن يطرق الباب.. لكنه رآه منفرجًا..يبدو ان احد الصغار خرج دون أن يوصده.. فولج للداخل وقبل أن يتفوه بكلمة شاهدها وهي جاثية على ركبتيها تدعك الأرض بفرشاه صغيرة وتنظفها بمعالم إعياء وشحوب واضحة.. فانفطر قلبه وتقطع نياطه وهاجت روحه غضبًا لأجلها ومن نفسه.. زوجته التي تحمل طفله الآن.. بدلًا من أن يرعاها ويدللها ويفرح معها هو والجميع.. هاهي تعاني توابع غلطته التي يصبغ عليها دائمًا نكهة شرعية..! اقترب ليرفعها من على الأرض ليوقفها أمامه، فبصر شحوبها وهزلانها اكثر عن قرب.. فغمغم بحزن: أنا أسف.. سامحيني ياجنة! فجأة وضعت كفها على فمها وشعور الغثيان يهاجمها بضراوة.. فركضت أمامه لتفرغ ما في معدتها بآنات زادت فزعه جنونه عليها.. فذهب ليسندها متمتم: تعالي ارتاحي وانا هساعدك ( وأجلسها فوق مقعد قريب وجثى أمامها يطالعها وكفيه مستقرة فوق ركبتيها) حبيبتي شكلك تعبانة اوي.. لازم تكشفي ياجنة اكيد في علاج وأدوية ومقويات محتاجة تاخديها في الأول! لم. تجيبه وهي تلتقط انفاسها اللاهثة بعد عناء القيء، فمسح على وجهها بحنان ثم نهض وخلع قميصه، فنظرت له بريبة غير مصدقة ما تظنه؟! هل ينوى الآن ما جال بذهنها وسيخلف وعده لها؟؟؟؟ لكنها اتسعت عيناها وهي تشاهده يثني أطراف بنطاله لعدة طبقات ويمسك الفرشاه ويواصل ما كانت تفعله بقوة وسرعة لينجز عملها بدلا منها قبل أن تأتي والدتها وتشاهده.. وبالفعل ظل ينظف تحت أنظارها المذهولة، ثم احتل قلبها شعور السعادة وهي تراه يفعل ما يفعله لأجلها.. دغدغها هذا الإحساس.. وكم تحبه وتريد ان تهنأ معه وتحتمي به من كل شيء.. تنهدت ثم غمغمت: كفاية يا ناصر انا هكمل.. وبعدين لو امي جت شافتك هتهزأني! هتف بحزم: حتى لو جت مايهمنيش، انا مش غريب وبساعد مراتي..! ( وواصل بسرعة انجاز كل شيء ثم جلس جوارها).. أسمعي ياجنة.. انا لازم اوديكي لدكتورة تشوفك وتكتبلك علاج عشان الغثيان والضعف اللي انتي فيه.. وانا خلاص كلمت ناس اعرفها هتسلفني مبلغ حلو اظبط بيه الدنيا بسرعة واجيب أوضة نوم على قدنا وهطلب من ابوكي نتجوز فورا صاحت بفرحة: بتتكلم. جد ياناصر.. يعني خلاص هتحل المشكلة وتاخدني بيتك.. ثم خفت حماسها وهتفت بخوف: بس ابويا مش هيوافق لأن لسه جهازي مش كامل ده يدوب كان بيبتدي يجيب حاجات هو وامي.. أكيد هيرفضوا..! هتف بقوة: مش هستسلم لرفضهم.. وهصمم نتجوز في خلال شهر بالكتير.. وان كان على جهازك يكملوا واحنا في بيتنا انا راضي..ثم منحها نظرة اكثر أمان: المهم انتي متخافيش قريب جدا هتتحل مشكلتنا..! هزت رأسها وهمت بالحديث، فهاجمتها نوبة. غثيان أخرى لتهرول أمامه ويسمع ثانيًا صوت آنينها وقامتها الهزيلة منحنية تفرغ ما بها.. فساعدها بغسل وجهها وتجفيفه ثم أرقدها على فراشها محذرًا : اسمعي اللي هقوله.. انتي هتنامي دلوقت.. خلاص شغل البيت خلص وامك مش هتقدر تتكلم اما تلاقيكي نايمة..! ثم غادر الغرفة وعاد حاملًا هديته وأردف: جبتلك الفانوس اللي كان نفسك فيه.. كل سنة وانتي طيبة ياحبيبتي..بإذن الله مش هايجي العيد غير واحنا محددين جوزنا..! ابتسمت بسعادة وهي تتخيل فانوسها الجميل يضوى وسط منزلهما.. نعم ستنتهي اهميته بانتهاء الشهر الكريم .. لكنها ستصنع هي طقوسها ومناسكها الخاصة بعد أن تظلل الراحة سقف حياتهما للأبد..وبتلك الابتسامة الحالمة تحت أنظاره المتأملة بصمت، سقطت بغفوتها التي تقاتل لتنالها، فأسدلت جفنيها وارتخى كل جسدها المستغيث لنيل الراحة! فظل يتأملها بحزن..ثم مال بشفتيه يُقبل جبينها قُبلة أودع بها وعد غير منطوق ان معاناتها لن تدوم طويلًا نوفيلا زوجتي ولكن يتبع للجزء الثاني

مقالات ذات صلة

تركني خطيبي

لبس العيد ج٣ اماني السيد

ابن اخويا حكايات زهره

قبل فرح اختي صافي هاني

حكايات نور محمد ج٤

الغربيه ج١

اترك تعليقاً إلغاء الرد