لما الفرحه بالحمل اتقلبت لخناقه ج2 منى السيد

الصالة كانت بتغلي على نار هادية، والمشهد اتحول من لمّة عيلة على فطار أول يوم في الشهر الكريم لمحكمة تفتيش كل أركانها بتهتز بالفضايح. ميرفت كانت قاعدة في الأرض ساندة ضهرها على النيش الخشب، عبايتها اتمرمطت في عصير الخشاف المدلوق على البلاط، وصوت شهقاتها وطالع زي حشرجة الموت. مفيش دموع حقيقية، كان خوف صرف، رعب الوشوش اللي بتتقلع عنها الأقنعة فجأة فتلاقي نفسها عريانة تماماً قدام حقيقتها القبيحة.
ستّي كريمة محركتش صباع واحد، ولا حتى مدت إيدها تسند بنتها اللي بتمثل الانهيار. كانت باصة لميرفت بعينين جامدة مفيش فيها دمعة واحدة، بس الوجع اللي كان طالع من ملامحها كفيل يهد جبال. السنين اللي عاشتها ستّي تربي وتكبر وتشيل شقا أبوهم الله يرحمه وتصون القرش الأبيض لليوم الأسود، كلها كانت بتعدي قدام عينيها في شريط سريع ومر. رفعت راسها وبصتلي، وعينها البنية الدبلانة من الزمن بتطلب مني الحقيقة كاملة من غير أي رتوش.
كملي يا ندى. صوت ستّي طلع واطي بس كان بيشق سكوت الأوضة كأنه موس. انتي بدأتي حبل الكلام، متسيبيهوش معلق. انطقي وقولي مين الشخص ده؟ وبنتي ميرفت ودّت شقايا وتعب السنين لمين؟
أمي سمر قربت من ستّي بخطوات بطيئة، وحطت إيدها على كتفها وهي بتعيط بحرقة يا أمي عشان خاطري اهدي.. الضغط هيعلى عليكي وسكرك هيسقط، تعالي ندخل جوة ونتفاهم بالراحة، بلاش كلام قدام الصغيرين.. ده رمضان يا أمي والناس صايمة.
إسلام أخويا

انتفض من مكانه فجأة، ووشه كان محتقن بالدم وعروق رقبته ناطة، صرخ في أمي بنبرة عصبية مقدرش يكتمها صغيرين مين يا ماما؟! انتي لسه شايفة إننا صغيرين ولازم نتداس بالجزم ويتخرب بيوتنا ونسكت عشان ست ميرفت تفضل عايشة دور الهانم الشريفة؟! بنك ووديعة وتحويلات وإحنا قاعدين زي المغفلين! انطقي يا ندى، متسكتيش، كملي وخلي العيلة دي تنضف من قرفها بقى!
طارق جوزي مسك كتف إسلام وهداه براحة اهدى يا إسلام، متعلّيش صوتك على والدتك، كل حاجة هتتعرف بالعقل والأصول. طارق بصلي وهز راسه بهدوء، نظرة كان معناها خلاص، مفيش مجال للرجوع، الحقيقة لازم تتقال كلها ومفيش حد يلومك بعد كده.
أنا وقفت، سندت إيدي على حرف السفرة وحسيت بتقل بطني والبيبي اللي في حشاي بيتحرك حركة خفيفة كأنه بيطمني. بصيت لميرفت اللي كانت بتدفن وشها في ركبها وبتندب بصوت واطي منك لله يا ندى.. خربتي بيتي.. منك لله يا شيخة.
ضحكت ضحكة وجع، وقولتلها بصوت صافي مسموع لكل اللي في الصالة أنا اللي خربت بيتك يا عمتي؟ ولا انتي اللي بيتك مخروب من يومه بالكدب والسرقة والغل؟ فاكرة لما جيتيلي البيت من تمن شهور؟ فاكرة لما كنتي راكعة على ركبتك في صالوني زي ما انتي راكعة دلوقتي كده وبتبوسي إيدي عشان مقولش لأمي ولا لستّي؟ فاكرة حكايتك اللي لفتيها عليا ولا أفكرك بالاسم اللي انتي حولتيله الفلوس؟
ميرفت رفعت راسها فجأة، عينيها كانت محمرة كأنها جمر، وصوتها طلع مخنوق زي فحيح التعبان
انتي ملكيش دعوة بيه! انتي متعرفيش حاجة! ده ابني.. ضنايا اللي من صلبي.. أرميه يعني؟! أسيبه يضيع عشان شوية ورق وفلوس وسخة؟!
الكلمة نزلت على ودن ستّي زي الصاعقة. ابنك؟ ستّي سألت الكلمة وهي بتبص لميرفت بعدم استيعاب ابنك مين يا ميرفت؟ هو انتي حيلتك غير أحمد بنتك وبنتك التانية نهى؟
لأ يا ستي.. مش أحمد ولا نهى، أنا اللي رديت، ومسبتش لميرفت فرصة تلف وتدور أكتر من كده الفلوس اتحولت لحساب حسام.. حسام ابن جوزها المرحوم اللي الكل عارف إنه قاطعها ومبيطقش يشوف وشها من يوم ما أبوه مات وسابلها الشقة.. حسام اللي كلنا عارفين إنه بتاع قمار وشيكات من غير رصيد ومطارد من طوب الأرض!
أمي شهقت شهقة خلتها ترجع لورا وتقعد على الكرسي مهدودة الحيل، وإسلام ضرب كف على كف وهو مش مصدق حسام؟! الصايع اللي كان بيتهجم عليكي زمان وكان عايز ياخد الشقة غصب؟! انتي بتديله ربع مليون جنيه من فلوس ستّي ليه يا ولية انتي؟!
ميرفت انهارت في العياط بجد المرة دي، صوت نحيبها ملأ البيت، بس مكنش ندم على الفلوس، كان ذل وانكسار مرير. رفعت إيديها الاتنين في الهوا وبقت تضرب على فخادها وتولول مكنش في إيدي حاجة يا ماما! مكنش في إيدي! حسام كان ماسك عليا وصلات أمانة.. كان هيدخلني السجن ويفضحني في وسطيكم وفي المنصورة كلها! كان جايبلي ناس مسجلين لحد باب البيت يهددوني بالقتل لو مخدش نصيبه من فلوس أبوه اللي قالي إني لهفتها بعد ما مات!
لهفتي إيه وسرقتي
إيه؟! ستّي كريمة قامت وقفت، ومشيت خطوات تقيلة لحد ما وصلت لميرفت، وقفت فوق دماغها زي قاضي مبيعرفش الرحمة، صوتها كان بيتهدج من كتر القهرة أنا اللي جوزتك الراجل ده على عيني وعلى راسي، وأنا اللي اشتريتلك عزالك من لحمي الحي! وأبوكي الله يرحمه هو اللي دفع تمن نص الشقة اللي انتي قاعدة فيها عشان يسترِك ويبقى ليكي سقف يحميكي انتي وعيالك بعد ما جوزك فلس ومات مسلول! تروحي تكسري وديعتي.. الوديعة اللي شايلاها لمرضي وموتي، عشان تسكتي واد صايع ضيع فلوس أبوه في القمار والمخدرات؟!
كنت خايفة يا ماما! ميرفت مسكت ديل جلابية ستّي وبقت تبوس في رجلها كنت خايفة اتفضح ويقولوا ميرفت مديونة وهتتسجن.. هو هدّدني إنه هيعملي قضية تبديد.. ندى عرفت بالصدفة لما شافتني معاه قدام البنك، ويومها روحتلها البيت وحكيتلها كل حاجة وحلفتلها إني هبيع حتة الأرض اللي ورثتها في البلد وأردلك الفلوس قبل ما رمضان يهل.. والله العظيم كنت هرجعهم!
كدابة! أنا اللي صرخت المرة دي، مقدرتش أستحمل التلفيق وقلب الحقايق كدابة يا ميرفت! انتي مباعتيش الأرض ولا عمرك نويتي تبيعيها! انتي روحتي كتبتي الأرض باسم بنتك نهى الشهر اللي فات عشان تضمنين إن محدش يعرف يطالبك بمليم! ومجيتيش عندي تترجيني عشان خايفة على ستّي.. انتي جيتي عشان كنتي عارفة إني معايا صورة من إيصال التحويل اللي نسييته الموظفة على المكتب وأنا كنت وراكي بالصدفة في البنك وبخلص ورق القرض بتاع
شقتي أنا وطارق!
لمحة نيوز