حادثه كشف المستور ج1 اماني السيد

دخل الأوضة ببطء، ومشيت خطواته لحد ما وقف جنب السر,,ـــــير. حسيت بنظراته عليا، لكن المره دي مش نظرات قلق أو خوف.. كانت نظرات حد بيتأكد إني مش هعمله مشكلة أو إني مش دريانة باللي بيحصل. قعد على الكرسي اللي جنب السر,,ـــــير، وتنهد بتعب تمثيلي، ورص أكياس الفحوصات والتحاليل الخاصة بأختي على الترابيزة اللي جنبي وكأنها المكان الطبيعي ليها! فتحت عيني بالراحة وبصيت له بثبات غريب، ثبات أنا نفسي ما كنتش عارفة جيبته منين.

أول ما شافني فتحت عيني، اتعدل في قعدته وقال بنبرة هادية كأنه بيمثل دور الزوج المهتم: “أنتِ صاحية؟ الحمد لله.. الدكتورة جِت وأنا بره وقالت إنك كويسة ومفيش كسور، مجرد كدمات بسيطة وهتخرجي بكرة الصبح”. سكتّ ثواني وبصيت في عينيه مباشرة، وسألته بصوت هادي جداً لكنه يقطع العرق والدم: “وأختي؟ هتخرج بكرة برضه ولا محتاجة تقعد جنبك شوية؟”.

ارتبك للحظة، وعينيه زادت حركتها وهو بيحاول يهرب من نظرتي، بس عدّل موقفه بسرعة وقال بحدة خفيفة عشان يقلب الطاولة عليا: “إيه النبرة دي يا هدى؟ أختك مخضوضة ورجلها متورمة والدكتور قال محتاجة ملاحظة.. طبيعي أقف جنبها، دي في حكم أختي برضه، ولا أنتِ عايزاني أسيبها لوحدها في الظروف دي؟”. ابتسمت ابتسامة سخرية وجع، وقلت له: “في حكم أختك؟ أختك اللي بتأكلها بإيدك في بقها وبتدلعها وبتسهر جنبها وتنسى إن لك زوجة في الأوضة اللي جنبها راجعة من حا.دثة؟ أختك اللي نزلْت جري من العربية عشان تطلعها هي الأول وسبتني أنا نازفة ومحبوسة جوه؟”.

وشّه اتغير تماماً، والألوان راحت منه لما عرف إني شفته وسمعته. وقف من على الكرسي بسرعة وقال بتلعثم: “أنتِ.. أنتِ جيتي ورانا الأوضة؟ أنتِ بتراقبيني؟”. رديت عليه وأنا بقوم ببطء وبقف على رجلي رغم الوجع: “أنا مابراقبكش يا خالد.. أنا ربنا كان عايز يوريني حقيقتك وحقيقة النفاق اللي كنت عايشة فيه. الحا.دثة دي مكانتش مجرد عربية خبطت في عربية، دي كانت الستارة اللي نزلت عن تمثيلية طالت أوي”.

بَصّ لي بغضب حاول يداري بيه توتره، وزعق بصوت واطي عشان محدش يسمعنا في الممر: “أنتِ إيه اللي بتقوليه ده؟ أنتِ مريضة وشكاكة أوي! دي أختك! أختك اللي من دمك، بدل ما يبقى قلبك عليها وتخافي عليها جاية تفكري في الأوهام والخيلات دي؟”. قرب مني خطوة وهو بيهز رأسه باستنكار وبيحاول يقلب المعضلة عليا ويطلعني أنا اللي غلطانة وأني غيرانة من أختي، وقال بحدة: “أنا عملت الواجب والإنسانية اللي أي راجل جدع يعمله، البنت كانت مرعوبة وبتعيط، وأنتِ ماشاء الله متماسكة وقوية ومش محتاجة طبطبة. العيب في تفكيرك أنتِ والمريضة اللي جواكِ اللي بتفسر الحنية والأصول على إنها حاجة تانية!”.