سليم وليلى ج11
ملك ابراهيم
والدته سكتت.. اتصدمت انه عرف.. فكرت ان ليلى حكت له اللي حصل.. وقالت بعناد: “أنا قولت لها تساعد الخدم.. فيها ايه يعني؟ هي كانت تحلم تشتغل خدامة في فيلا زي دي”
سليم اتصدم ومش قادر يستوعب اللي بيسمعه وقال بذهول: “تساعد الخدم؟ انتي كنتي عايزة تشغلي مراتي خدامة هنا؟”
والدته ردت ببرود: “في ايه يا سليم.. ما هو ده أصلها.. هي مش كانت بتشتغل عندك في المستشفى.. ايه الغريب لما تشتغل هنا الفيلا ”
سليم كان هيتجنن من اللي بيسمعه وقال بزعيق: “انتي بتقولي ايه!! انتي نسيتي انها مراتي؟ نسيتي انها شايلة اسمي؟ دي مرات ابنك مش خدامة”
والدته قالت بغل: “أنا بعمل كده عشان مصلحتك.. البنت دي مش من مستوانا.. وكان لازم أخرجها من حياتك قبل ما تتعلق بيها أكتر من كده”
سليم بص لها بخيبة أمل وقال: “تخرجيها من حياتي ؟ انتي عارفة ان ليلى كانت هتموت بسببك؟ كانت هتموت من القهرة والذل.. انا عمري ما هسامحك علي اللي عملتيه فيها”
والدته بصت له بصدمة وقالت:” مين البنت دي عشان تتكلم معايا بالطريقه دي عشانها.. فوق يا سليم”
سكت شوية وبص لها نظرة طويلة وقال بثبات وقرار: “انا فعلا فوقت يا ماما.. من النهاردة ليلى وكريم مش هيقعدوا هنا تاني.. وانا كمان مش هعيش في مكان مراتي اتهانت فيه وللأسف مش عارف اجيب لها حقها لأن اللي عملت فيها كده امي.. ومش هرجع هنا تاني غير لما تعرفي ان ليلى دي مراتي وليها احترامها في اي مكان تدخله؟”
والدته بصت له بصدمة وقالت: ” معقول هتسيب بيت أهلك عشان حتة بنت زي دي؟”
سليم قال بثقة: “أيوا هسيب بيت أهلي عشان كرامة مراتي.. ليلى دي أمانة في رقبتي وربنا هيسألني عليها.. وأنا مش هسمح لحد يهينها تاني حتى لو كنتي انتي يا أمي” قالها بحزم.
وسابها واقفة مصدومة ومشي.
ركب عربيته ورجع على المستشفى تاني.. وهو مقرر انه هيبدأ حياة جديدة مع ليلى وكريم بعيد عن أي حد ممكن يفرقهم.
حكاية سليم وليلى للكاتبة ملك إبراهيم.
سليم وصل المستشفى وهو قلبه مقبوض وخايف ليلى تكون تعبت تاني.. طلع على أوضة ليلى بسرعة وفتح الباب بلهفة.. لقى الأوضة فاضية ومفيهاش حد.. السرير فاضي والكانولا مرمية على الأرض والملاية مكرمشة.
اتخض.. الممرضة هناء قربت منه وهي شايلة ملف وقالت بحزن: “ليلى صممت تاخد أخوها وتمشي يا دكتور سليم ومفيش حد عرف يوقفها عشان متحصلش شوشرة في المستشفى.. قالت انها عايزة تروح بيتها.. الآنسة تولين حاولت تكلم حضرتك وتليفونك مش بيرد.. وراحت توصل ليلى وكريم بعربيتها عشان متسيبهاش لوحدها وهي تعبانة” قالتها بقلق.
